ក្រុមហ៊ុន Uber បានប្រកាសបញ្ឈប់ប្រតិបត្តិការរបស់ខ្លួននៅក្នុងប្រទេសនីហ្សេរីយ៉ា និងប្រទេសអ៊ូហ្គង់ដា ដោយមានប្រសិទ្ធភាពភ្លាមៗ នៅថ្ងៃពុធ ទី ៣ ខែកញ្ញា ឆ្នាំ ២០២៦ តាមការរាយការណ៍របស់ស្ថានីយទូរទស្សន៍ Sky News។ ក្នុងសេចក្តីថ្លែងការណ៍របស់ខ្លួន ក្រុមហ៊ុនបានបញ្ជាក់ថា ការបញ្ឈប់ប្រតិបត្តិការនៅនីហ្សេរីយ៉ា គឺផ្អែកលើ «ការត្រួតពិនិត្យអាជីវកម្មរបស់ខ្លួនឱ្យបានហ្មត់ចត់»។

កាសែត The Hindu បានរាយការណ៍ថា Uber ធ្លាប់បានដំណើរការអាជីវកម្មនៅក្នុងប្រទេសនីហ្សេរីយ៉ាអស់រយៈពេល ១២ ឆ្នាំ ហើយការសម្រេចចិត្តបិទអាជីវកម្មនេះ គឺធ្វើឡើងបន្ទាប់ពីការពិនិត្យឡើងវិញនូវប្រតិបត្តិការ ដោយក្រុមហ៊ុនមិនបានបញ្ជាក់លម្អិតបន្ថែមអំពីមូលហេតុនៃការដកខ្លួននេះឡើយ។ ចំណែកកាសែត Washington Post បានរាយការណ៍ថា ការប្រកាសដ៏ភ្លាមៗនេះ បានកើតឡើងចំពេលដែលក្រុមហ៊ុនកំពុងប្រឈមនឹងឧបសគ្គផ្សេងៗក្នុងការដំណើរការអាជីវកម្ម រួមទាំងតម្លៃប្រេងដែលឡើងថ្លៃខ្ពស់ផងដែរ។

ការបញ្ឈប់ប្រតិបត្តិការយ៉ាងភ្លាមៗនេះ បានធ្វើឲ្យអ្នកបើកបរ និងអ្នកប្រើប្រាស់សេវាកម្មនៅក្នុងប្រទេសដែលរងផលប៉ះពាល់ មានការភ្ញាក់ផ្អើលយ៉ាងខ្លាំង ដោយសារតែពួកគេមិនបានទទួលការជូនដំណឹងជាមុន តាមការរាយការណ៍ដដែលរបស់កាសែត Washington Post។ ការចាកចេញពីនីហ្សេរីយ៉ា និងអ៊ូហ្គង់ដានេះ ក៏បានធ្វើឲ្យកម្មវិធីដឹកអ្នកដំណើរតាមទូរស័ព្ទនេះ នៅសល់វត្តមានកាន់តែតិចតួចនៅលើទ្វីបអាហ្វ្រិកផងដែរ។

គេហទំព័រ The Africa Report បានរាយការណ៍ថា ការដកខ្លួនចុងក្រោយរបស់ក្រុមហ៊ុនដឹកអ្នកដំណើរអាមេរិកនេះពីទីផ្សារអាហ្វ្រិក គឺជាផ្នែកមួយនៃការដកថយកាន់តែជ្រៅនៅក្នុងតំបន់ ហើយក៏បានបើកច្រកផ្លូវឲ្យក្រុមហ៊ុនគូប្រជែង ដូចជា Bolt និង inDrive ដែលសម្របខ្លួនបានល្អប្រសើរជាងទៅនឹងតម្លៃសេវា និងថ្លៃចំណាយក្នុងស្រុក ប្រជែងដណ្តើមចំណែកទីផ្សារបន្ថែមទៀត។ បន្ទាប់ពីការដកខ្លួននេះ Uber នៅតែបន្តមានវត្តមាននៅអាហ្វ្រិកខាងត្បូង កេនយ៉ា ហ្គាណា អេហ្ស៊ីប និងម៉ារ៉ុក តាមការរាយការណ៍ដដែល។

ទន្ទឹមនឹងនេះ គណបក្សនយោបាយមួយនៅនីហ្សេរីយ៉ា បានរិះគន់គោលនយោបាយរបស់រដ្ឋាភិបាលជុំវិញការចាកចេញរបស់ Uber នេះ។ តាមវេទិកាព័ត៌មាន AllAfrica ដែលបានដកស្រង់ពីកាសែត Leadership របស់នីហ្សេរីយ៉ា គណបក្សសមាជប្រជាធិបតេយ្យអាហ្វ្រិក (ADC) បានចាត់ទុកការចាកចេញរបស់ Uber ពីនីហ្សេរីយ៉ា រួមជាមួយការបិទ ឬកាត់បន្ថយប្រតិបត្តិការរបស់ក្រុមហ៊ុនអន្តរជាតិធំៗមួយចំនួនទៀត ថាជាភ័ស្តុតាងបន្ថែមដែលបង្ហាញថា គោលនយោបាយសេដ្ឋកិច្ចរបស់ប្រធានាធិបតី បូឡា អាហ្មេដ ទីនូប៊ូ កំពុងប្រែក្លាយប្រទេសនីហ្សេរីយ៉ាទៅជា «ទីបញ្ចុះសពអាជីវកម្ម»។