តាមការរាយការណ៍របស់ The Guardian រូបភាពផ្កាយរណបពីក្រុមហ៊ុន Vantor បង្ហាញថា មានយន្តហោះវាយប្រហារស្រាលចំនួន ៨ គ្រឿង និងយានយោធាជាង ១០ គ្រឿង នៅព្រលានយន្តហោះបានកើន (Ban Keun) ក្នុងប្រទេសឡាវ។ The Guardian រាយការណ៍ថា មជ្ឈមណ្ឌលនេះបានបើកកាលពីសប្តាហ៍មុន ផ្តល់ឱ្យកងទ័ពអាកាសចិននូវជំហរដំបូងរបស់ខ្លួននៅអាស៊ីអាគ្នេយ៍ដីគោក ហើយបង្កការព្រួយបារម្ភនៅក្នុងតំបន់។

South China Morning Post (SCMP) រាយការណ៍ថា ក្រសួងការពារជាតិនៃរដ្ឋាភិបាលចិន បានថ្លែងថា មជ្ឈមណ្ឌលគាំទ្រ និងបណ្តុះបណ្តាលរួមនេះ នឹងពង្រឹងជំនាញអ្នកបើកយន្តហោះកងទ័ពអាកាសឡាវ ហើយមិនមែនសំដៅប្រឆាំងនឹងភាគីទីបីណាមួយឡើយ។ Nikkei Asia រាយការណ៍ថា នេះជាមូលដ្ឋានបណ្តុះបណ្តាលអ្នកបើកយន្តហោះរួមគ្នារវាងចិន និងឡាវ។ ខណៈចិនហៅវាថាមជ្ឈមណ្ឌលគាំទ្រ និងបណ្តុះបណ្តាល ប្រព័ន្ធផ្សព្វផ្សាយអន្តរជាតិ រួមទាំង The Guardian និង New York Times (NYT) ចាត់ទុកវាជាមូលដ្ឋានយោធាថ្មីរបស់ចិន។

NYT រាយការណ៍ថា ចិនកំពុងពង្រីកវិសាលភាពយោធារបស់ខ្លួន តាមរយៈការសាងសង់មូលដ្ឋាននេះ ខណៈផ្លូវរត់នៅបានកើនបច្ចុប្បន្នប្រើប្រាស់តែសម្រាប់យន្តហោះខ្នាតតូចប៉ុណ្ណោះ។ NYT រាយការណ៍ថា ប្រទេសជិតខាងកំពុងតាមដានដោយប្រុងប្រយ័ត្នថា តើចិននឹងពង្រីកផ្លូវរត់សម្រាប់យន្តហោះធំជាងនេះឬទេ។

SCMP រាយការណ៍ថា អ្នកសង្កេតការណ៍យល់ថា មូលដ្ឋាននេះអាចធ្វើឱ្យវៀតណាមមិនស្ងប់ចិត្ត ខណៈដែលវាក៏មានគោលដៅជួយធ្វើទំនើបកម្មកងទ័ពរបស់វៀងចន្ទន៍ និងរក្សាតុល្យភាពទំនាក់ទំនងការពារជាតិរវាងប៉េកាំង មូស្គូ និងហាណូយ។ The Diplomat វិភាគថា មូលដ្ឋាននេះបង្កការគំរាមកំហែងផ្ទាល់ត្រឹមកម្រិតចំពោះសមុទ្រចិនខាងត្បូង និងតៃវ៉ាន់ ប៉ុន្តែវានឹងបង្កើនសមត្ថភាពចិនក្នុងការដាក់សម្ពាធលើកងទ័ពជើងទឹកសហរដ្ឋអាមេរិក។