កម្ពុជា និងថៃ បានឯកភាពគ្នាលើវិធានការកសាងទំនុកចិត្ត ក្រោមអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS) ក្នុងកិច្ចប្រជុំលើកទី២ នៃគណៈកម្មការផ្សះផ្សា ដែលប្រព្រឹត្តទៅពីថ្ងៃទី១៤ ដល់ថ្ងៃទី១៨ ខែតុលា នៅទីក្រុងឡាអេ ប្រទេសហូឡង់។ នេះបើតាមការរាយការណ៍របស់ Phnom Penh Post ដោយយោងលើសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជា ចុះថ្ងៃទី១៨ ខែតុលា។

Phnom Penh Post បានរាយការណ៍ថា ក្នុងចំណោមវិធានការដែលបានឯកភាព ភាគីទាំងពីរទទួលស្គាល់សិទ្ធិរបស់ខ្លួនក្នុងការធ្វើសេចក្តីថ្លែងការណ៍ជាសាធារណៈ ដើម្បីការពារសិទ្ធិស្របច្បាប់ ឬកែតម្រូវព័ត៌មានមិនពិត និងព័ត៌មានបំភាន់។ ក្រសួងការបរទេសកម្ពុជា បានឱ្យដឹងថា វិធានការទាំងនេះមានគោលបំណងជំរុញទំនុកចិត្តទៅវិញទៅមក និងសម្រួលដល់ដំណោះស្រាយដោយសមហេតុផល និងមិត្តភាព ស្របតាមច្បាប់អន្តរជាតិ។

ដោយឡែក Khaosod បានរាយការណ៍ពីទីក្រុងឡាអេថា ថៃបានបញ្ជាក់ជាថ្មីថា ការកំណត់ព្រំដែនសមុទ្រ ត្រូវតែជាការផ្តោតចម្បងតែមួយគត់នៃដំណើរការផ្សះផ្សាជាមួយកម្ពុជា ខណៈដែលភាគីថៃជំរុញឱ្យប្រទេសទាំងពីរអនុវត្តវិធានការកសាងទំនុកចិត្ត ដើម្បីទប់ស្កាត់ភាពតានតឹងបន្ថែមទៀត។

ទោះយ៉ាងណា Phnom Penh Post បានឱ្យដឹងថា ការឯកភាពនេះកើតឡើងខណៈប្រទេសទាំងពីរនៅតែបន្តការពារគោលជំហររៀងៗខ្លួនពាក់ព័ន្ធនឹងការកំណត់ព្រំដែនសមុទ្រ ហើយនៅមានការលើកឡើងខុសគ្នាអំពីរបៀបដែលប្រទេសទាំងពីរគួរបង្ហាញការទាមទារនៅលើវេទិកាអន្តរជាតិ។ ភាគីថៃបានសង្កត់ធ្ងន់លើការចៀសវាងការចោទប្រកាន់គ្នានៅលើវេទិកាអន្តរជាតិ ដែលអាចប៉ះពាល់ដល់ដំណើរការផ្សះផ្សាដែលកំពុងបន្ត។

ក្រសួងការបរទេសកម្ពុជា បានឱ្យដឹងថា គណៈកម្មការផ្សះផ្សា បានលើកទឹកចិត្តភាគីទាំងពីរឱ្យអនុវត្តវិធានការដែលទើបឯកភាពគ្នានេះឱ្យបានពេញលេញ និងមានប្រសិទ្ធភាព ដោយចាត់ទុកថាវិធានការទាំងនេះមានសារៈសំខាន់សម្រាប់ការជំរុញដំណើរការផ្សះផ្សា។ ក្រសួងបានបញ្ជាក់ថា៖ «គណៈកម្មការ បានលើកទឹកចិត្តភាគីទាំងពីរឱ្យអនុវត្តកិច្ចព្រមព្រៀង និងវិធានការដែលមានស្រាប់ ដើម្បីជួយបង្កើតបរិយាកាសអំណោយផលដល់ការចរចាប្រកបដោយការស្ថាបនា ក្នុងក្របខណ្ឌនៃដំណើរការផ្សះផ្សា»។ ទន្ទឹមនឹងនេះ គណៈកម្មការក៏បានកត់សម្គាល់ថា កិច្ចព្រមព្រៀង និងវិធានការដែលកម្ពុជា និងថៃបានឯកភាពគ្នាពីមុន មិនទាន់ត្រូវបានអនុវត្តពេញលេញនៅឡើយទេ។