តាមការរាយការណ៍របស់ The Guardian ក្រុមហ៊ុន Japan Airlines នឹងចាប់ផ្តើមសាកល្បងប្រើមនុស្សយន្តរូបរាងមនុស្សនៅអាកាសយានដ្ឋានហានេដា ទីក្រុងតូក្យូ ចាប់ពីដើមខែឧសភា ដោយមានគោលដៅប្រើប្រាស់ជាអចិន្ត្រៃយ៍នៅពេលក្រោយ។

The Guardian បានរាយការណ៍ថា មនុស្សយន្តទាំងនោះនឹងបំពេញការងារជាមួយនឹងបុគ្គលិកដឹកអីវ៉ាន់ដែលធ្វើការច្រើនហួសកម្លាំងរួចទៅហើយ ប៉ុន្តែមនុស្សយន្តទាំងនេះត្រូវការសម្រាកដើម្បីសាកថ្មជាប្រចាំ។

ចំណែកឯ CNBC រាយការណ៍ថា ការសាកល្បងនេះធ្វើឡើងក្នុងបរិបទដែលជប៉ុនកំពុងប្រឈមនឹងបញ្ហាកម្លាំងពលកម្មចាស់ជរា និងកង្វះបុគ្គលិកនៅផ្នែកសេវាកម្មលើដី នៃវិស័យអាកាសចរណ៍។

តាម CNBC ការកើនឡើងយ៉ាងលឿននៃភ្ញៀវទេសចរបរទេសចូលមកជប៉ុន បានបង្កើនសម្ពាធបន្ថែមលើបុគ្គលិកអាកាសយានដ្ឋាន ដែលធ្វើឲ្យដំណោះស្រាយបច្ចេកវិទ្យាបែបនេះមានសារសំខាន់កាន់តែខ្លាំងឡើង។

The Guardian បន្ថែមថា ជប៉ុនត្រូវបានគេស្គាល់ថាមានបុគ្គលិកដឹកអីវ៉ាន់ដែលប្រកបដោយការទទួលខុសត្រូវខ្ពស់ ប៉ុន្តែបញ្ហាប្រជាជនចាស់ជរា និងអត្រាកំណើតទាបបានធ្វើឲ្យកង្វះកម្លាំងពលកម្មក្លាយជាបញ្ហារ៉ាំរ៉ៃនៅពេញប្រទេស។