នៅថ្ងៃអង្គារ ទី ២៦ ខែឧសភា ក្រសួងសុខាភិបាលថៃបានចេញបញ្ជាជាផ្លូវការដោយតម្រូវឱ្យអ្នកធ្វើដំណើរគ្រប់រូបដែលមកពីប្រទេសសាធារណរដ្ឋប្រជាធិបតេយ្យកុងហ្គោ (DR Congo) និងអ៊ូហ្គង់ដា ឬដែលបានឆ្លងកាត់ប្រទេសទាំងពីរ ត្រូវធ្វើចត្តាឡីស័ករយៈពេល ២១ ថ្ងៃពេញ។ នេះជាការពង្រឹងវិធានការគ្រប់គ្រងព្រំដែន ដើម្បីទប់ស្កាត់ការរីករាលដាលនៃជំងឺអេបូឡាពីទ្វីបអាហ្វ្រិក បើយោងតាមការរាយការណ៍ពីកាសែត Bangkok Post និង New Straits Times ។
យោងតាម New Straits Times វិបត្តិជំងឺអេបូឡានៅ DR Congo និងអ៊ូហ្គង់ដាកំពុងស្ថិតក្នុងកម្រិតធ្ងន់ធ្ងរ ដែលបង្កជាក្តីបារម្ភដល់សុខភាពសាធារណៈអន្តរជាតិ។ រដ្ឋាភិបាលថៃបានដាក់ចេញវិធានការនេះក្នុងគោលដៅទប់ស្កាត់ការនាំចូលនៃវីរុសអេបូឡាចូលមកក្នុងប្រទេស។
The Straits Times បានរាយការណ៍បន្ថែមថា អ្នកធ្វើដំណើរនឹងត្រូវធ្វើចត្តាឡីស័កដោយមិនគិតពីថាពួកគេមានរោគសញ្ញានៃជំងឺអេបូឡា ឬអត់នោះទេ។ សូម្បីតែអ្នកដែលមិនបង្ហាញរោគសញ្ញាក៏ត្រូវឆ្លងកាត់ចត្តាឡីស័កជាកាតព្វកិច្ចរយៈពេល ២១ ថ្ងៃដែរ។
យោងតាម Bangkok Post ការសម្រេចនេះក៏ត្រូវបានជំរុញដោយការកើនឡើងនៃចំនួនអ្នកធ្វើដំណើរពីតំបន់អាហ្វ្រិកកណ្តាល និងការខ្វះកិច្ចសហការពីសំណាក់អ្នកធ្វើដំណើរមួយចំនួន។ កត្តាទាំងនេះធ្វើឱ្យការគ្រប់គ្រងមានភាពលំបាក ហើយបង្ខំឱ្យថៃពង្រឹងវិធានការជាបន្ទាន់។
នេះជាវិធានការដ៏ម៉ឺងម៉ាត់បំផុតមួយ ក្នុងការប្រយុទ្ធប្រឆាំងនឹងការរាតត្បាតនៃជំងឺអេបូឡានៅក្នុងតំបន់។