តាមការរាយការណ៍របស់សារព័ត៌មាន The Guardian ញត្តិដែលមានចំណងជើងថា “Protect Japanese Manga” នៅលើវេទិកា Change.org បានទទួលហត្ថលេខាប្រមាណ ២ ម៉ឺននាក់។ កំហឹងនេះបានផ្ទុះឡើងបន្ទាប់ពីគណនី X របស់សេតវិមានបានបង្ហោះវីដេអូដោយប្រើរូបភាពពីស៊េរីល្បីដូចជា Dragon Ball, Yu-Gi-Oh! និង Naruto ដោយគ្មានការអនុញ្ញាតពីម្ចាស់កម្មសិទ្ធិ។ អ្នកគាំទ្រក៏បានសម្តែងការមិនពេញចិត្តតាមបណ្តាញសង្គមផងដែរ។

កាសែត South China Morning Post (SCMP) បានរាយការណ៍ថា ករណីថ្មីបំផុតដែលបង្កឲ្យមានប្រតិកម្មខ្លាំង គឺវីដេអូមួយដែលបានបង្ហោះនៅលើបណ្តាញ Truth Social កាលពីថ្ងៃសៅរ៍ ដោយបង្ហាញលោក Trump ក្នុងរូបភាពតួអង្គ Ninja ឈ្មោះ Naruto Uzumaki ។ វីដេអូនេះជាផ្នែកមួយនៃចម្រៀងដែលផលិតដោយបញ្ញាសិប្បនិម្មិត (AI) មានចំណងជើងថា “Thank You, President Trump” និពន្ធដោយលោក Anthony Constantino សមាជិកគណបក្សសាធារណរដ្ឋ។

យោងតាមកាសែត The Straits Times ញត្តិ “Protect Japanese Manga” ត្រូវបានចាប់ផ្តើមដំបូងនៅខែមីនា ឆ្នាំ ២០២៦ បន្ទាប់ពីមានការប្រើប្រាស់រូបភាពតុក្កតាជប៉ុនជាបន្តបន្ទាប់។ ញត្តិនេះត្រូវបានបើកឡើងវិញនៅថ្ងៃទី ៩ មិថុនា បន្ទាប់ពីវីដេអូ AI ថ្មីបានបង្ហោះ ហើយចំនួនអ្នកចុះហត្ថលេខាកើនឡើងយ៉ាងឆាប់រហ័សរហូតជិត ២ ម៉ឺននាក់។ ញត្តិនេះមានគោលបំណងការពារសិទ្ធិបញ្ញារបស់អ្នកបង្កើត Manga ជប៉ុនផងដែរ។

ទន្ទឹមនឹងនេះ សារព័ត៌មាន Rappler បានផ្សាយអត្ថាធិប្បាយមួយដោយចង្អុលបង្ហាញថា ការប្រើ AI ដើម្បីឲ្យលោក Trump ក្លែងធ្វើជាតួ Naruto គឺជាការខុសឆ្គងទាំងស្រុង ពីព្រោះលក្ខណៈរបស់តួអង្គទាំងពីរខុសគ្នាខ្លាំង ហើយមិនស្របនឹងសារដើមដែលរឿង Naruto ចង់បង្ហាញឡើយ។

រហូតមកដល់ពេលនេះ ក្រុមការងារសេតវិមានមិនទាន់មានការឆ្លើយតបជាផ្លូវការចំពោះញត្តិនេះទេ។