តាមការរាយការណ៍របស់ BBC, Al Jazeera និងសារព័ត៌មាន Khaosod របស់ប្រទេសថៃ ក្រុមជម្រើសជាតិអ៊ីរ៉ង់គ្រោងនឹងដាក់ពាក្យប្ដឹងជាផ្លូវការទៅកាន់សហព័ន្ធបាល់ទាត់អន្តរជាតិ (FIFA) ជុំវិញការរឹតត្បិតការធ្វើដំណើរដែលពួកគេត្រូវប្រឈមមុខនៅសហរដ្ឋអាមេរិក អំឡុងព្រឹត្តិការណ៍បាល់ទាត់ World Cup ឆ្នាំ២០២៦។ ការសម្រេចនេះកើតមានឡើងបន្ទាប់ពីសំណើរបស់ពួកគេក្នុងការធ្វើដំណើរទៅកាន់ទឹកដីអាមេរិកពីរថ្ងៃមុនការប្រកួតបន្ទាប់របស់ពួកគេត្រូវបានបដិសេធ តាមការរាយការណ៍របស់ Al Jazeera ។

តាមការរាយការណ៍របស់ Khaosod ក្រុមអ៊ីរ៉ង់មានទីតាំងស្នាក់នៅក្នុងប្រទេសម៉ិកស៊ិក ដែលជាម្ចាស់ផ្ទះរួមនៃ World Cup ឆ្នាំនេះ ហើយពួកគេត្រូវធ្វើដំណើរទៅកាន់សហរដ្ឋអាមេរិកសម្រាប់ការប្រកួតចំនួន៣ក្នុងវគ្គចែកពូល។ អាជ្ញាធរអាមេរិកបានកំណត់ថាក្រុមនេះត្រូវតែចូលទៅក្នុងប្រទេសក្នុងរយៈពេល ២៤ ម៉ោងមុនពេលចាប់ផ្តើមការប្រកួត ហើយត្រូវចាកចេញក្នុងថ្ងៃដដែលក្រោយការប្រកួតបញ្ចប់។ ការកំណត់នេះបានធ្វើឲ្យសំណើរបស់ក្រុមអ៊ីរ៉ង់ក្នុងការធ្វើដំណើរទៅទីក្រុងម្ចាស់ផ្ទះពីរថ្ងៃមុនការប្រកួតបើកឆាកទល់នឹងក្រុមនូវែលសេឡង់ ត្រូវបានបដិសេធ។

សេចក្តីថ្លែងការណ៍របស់សហព័ន្ធបាល់ទាត់អ៊ីរ៉ង់ដែលចេញផ្សាយនៅថ្ងៃសុក្រកន្លងមក ត្រូវបាន Khaosod ដកស្រង់ថា «សហព័ន្ធបាល់ទាត់អ៊ីរ៉ង់ជឿជាក់ថា ការរឹតត្បិតទាំងនេះមិនស្របនឹងគោលការណ៍នៃការផ្ដល់លក្ខខណ្ឌស្មើភាពសម្រាប់ក្រុមចូលរួម ហើយអាចប៉ះពាល់ដល់ការត្រៀមបច្ចេកទេសរបស់ពួកគេ»។ លោក Amir Ghalenoei អ្នកគ្រូបង្វឹកក្រុមជម្រើសជាតិអ៊ីរ៉ង់ បាននិយាយថាអ៊ីរ៉ង់គឺជាក្រុមដែលត្រូវគេគាបសង្កត់ខ្លាំងជាងគេក្នុងការប្រកួតនេះ។

រីឯសារព័ត៌មាន AsiaOne របស់សិង្ហបុរី បានរាយការណ៍ខុសគ្នាថា កាលវិភាគធ្វើដំណើរដែលអ៊ីរ៉ង់កំពុងប្រឈម ពុំមែនជារឿងពិសេសនោះឡើយ ដោយក្រុមបាល់ទាត់ផ្សេងទៀតក៏ត្រូវប្រឈមនឹងលក្ខខណ្ឌធ្វើដំណើរស្រដៀងគ្នាដែរ។ ទោះយ៉ាងណា មិនទាន់មានព័ត៌មានលម្អិតអំពីក្រុមណាខ្លះត្រូវបានបញ្ជាក់នៅឡើយទេ។