បាកដាដ — តាមការរាយការណ៍របស់ Al Jazeera និង Shafaq News កងកម្លាំងសន្តិសុខអ៊ីរ៉ាក់ រួមមានកងកម្លាំងប្រឆាំងភេរវកម្ម និងកងកម្លាំងពិសេស បានបើកការវាយឆ្មក់នៅទូទាំងទីក្រុងបាកដាដ រួមទាំងសង្កាត់ Sadr City សួន Shaab និងតំបន់បៃតងដែលជាតំបន់ទូតនិងស្ថាប័នរដ្ឋាភិបាល ព្រមទាំងខេត្តបាប៊ីល ម៉ៃសាន និងអឺប៊ីលផងដែរ។ The Straits Times បានរាយការណ៍ថា ប្រតិបត្តិការនេះចេញបញ្ជាដោយផ្ទាល់ពីនាយករដ្ឋមន្ត្រី Ali al-Zaidi។ មន្ត្រីជាន់ខ្ពស់ម្នាក់ប្រាប់ Shafaq News ថា ការចូលចេញតំបន់បៃតងត្រូវបានរឹតបន្តឹង ហើយយានយន្តទាំងអស់ត្រូវបានត្រួតពិនិត្យយ៉ាងម៉ឺងម៉ាត់។

សារព័ត៌មានរដ្ឋ INA បានរាយការណ៍ថា ជនសង្ស័យចំនួន ៤៧នាក់ត្រូវបានឃាត់ខ្លួន ក្នុងនោះរួមមានប្រធានសម្ព័ន្ធ al-Azm លោក Muthanna al-Samarrai សមាជិកសភាមួយចំនួនដូចជាលោក Ziad al-Janabi លោក Bahaa al-Nouri និងអ្នកដទៃទៀត ព្រមទាំងអនុរដ្ឋមន្ត្រីប្រេងសម្រាប់វិស័យចែកចាយលោក Ali Maarij និងអតីតសមាជិកសភាលោក Mohammed al-Sayhoud។ យោងតាម Shafaq News គណៈកម្មការសុចរិតភាពអ៊ីរ៉ាក់បានឱ្យដឹងថា ខ្លួនបានរឹបអូសប្រាក់សរុប ១០លានដុល្លារអាមេរិក និង ៣១ពាន់លានឌីណាអ៊ីរ៉ាក់ (ស្មើនឹងប្រាក់ប្រមាណ ២៣,៥លានដុល្លារ) ពីការស៊ើបអង្កេតករណីពុករលួយ។

Shafaq News បានរាយការណ៍ថា មេដឹកនាំសាសនានិងនយោបាយលោក Muqtada al-Sadr បានគាំទ្រយុទ្ធនាការនេះ និងជំរុញឱ្យនាយករដ្ឋមន្ត្រីបន្តដោយមិនរើសអើងគណបក្ស។ សមាគមមេធាវីអ៊ីរ៉ាក់បានបដិសេធមិនផ្តល់សេវាការពារក្តីដល់ជនជាប់ចោទក្នុងយុទ្ធនាការនេះ ដោយចាត់ទុកថាវាជាការបើក «បង្អួចថ្មី» សម្រាប់ប្រទេស។ គណៈកម្មាធិការសុចរិតភាពនៃសភាអ៊ីរ៉ាក់ក៏បានគាំទ្រនិងអំពាវនាវឱ្យពង្រីកវិសាលភាពទៅគ្រប់ខេត្តផងដែរ។ រីឯសម្ព័ន្ធនយោបាយរបស់អតីតនាយករដ្ឋមន្ត្រី Mohammed Shia al-Sudani បានព្រមានអំពី «ព័ត៌មានបំភ្លៃ» ប៉ុន្តែនៅតែគាំទ្រដល់ការប្រយុទ្ធប្រឆាំងអំពើពុករលួយ។

Iran International បានរាយការណ៍ដោយផ្អែកលើប្រភពរបស់ខ្លួនថា ក្នុងចំណោមអ្នកដែលត្រូវបានចាប់ខ្លួន មានឥស្សរជនជាប់ទាក់ទងនឹងគណបក្សស៊ីអ៊ីតជិតស្និទ្ធនឹងប្រទេសអ៊ីរ៉ង់ ហើយប្រតិបត្តិការនេះភ្ជាប់ទៅនឹងការចោទប្រកាន់ពីការរត់ពន្ធប្រេងអ៊ីរ៉ង់។ ទោះយ៉ាងណា អាជ្ញាធរអ៊ីរ៉ាក់មិនទាន់ចេញមុខបញ្ជាក់ពីទំនាក់ទំនងនេះជាផ្លូវការឡើយ។ ទន្ទឹមនេះ ប្រភពសន្តិសុខបានប្រាប់ Shafaq News ថា ដំណាក់កាលទីពីរនៃប្រតិបត្តិការគ្រោងនឹងកំណត់គោលដៅលើមន្ត្រីជាន់ខ្ពស់ជាងនេះ រួមមានអ្នកនយោបាយ អគ្គនាយក និងអ្នកជំនួញធំៗ។