នៅក្នុងពិធីអបអរសាទរខួបលើកទី៣០ឆ្នាំ នៃអង្គការដើម្បីភាពញញឹមនៃកុមារ (PSE) និងពិធីប្រគល់សញ្ញាបត្រជូនសិស្ស-និស្សិត ៥០០នាក់ កាលពីថ្ងៃទី២ ខែកក្កដា ឆ្នាំ២០២៦ លោកនាយករដ្ឋមន្ត្រី ហ៊ុន ម៉ាណែត បានច្រានចោលយ៉ាងច្បាស់លាស់នូវការចោទប្រកាន់ដែលថា រាជរដ្ឋាភិបាលកម្ពុជាកំពុងធ្វើការរឹតត្បិត ឬបិទសិទ្ធិសកម្មភាពរបស់អង្គការសង្គមស៊ីវិល។ តាមការរាយការណ៍របស់ Phnom Penh Post និង Khmer Times លោកបានអះអាងថា រាជរដ្ឋាភិបាលតែងតែបើកទូលាយ និងគាំទ្រអង្គការដែលធ្វើការប្រកបដោយតម្លាភាព ស្មោះត្រង់ និងបានផ្ដល់ផលប្រយោជន៍ពិតប្រាកដដល់ប្រជាពលរដ្ឋ។

Phnom Penh Post បានផ្សាយបន្ថែមថា លោក ហ៊ុន ម៉ាណែត បានបង្ហាញតួលេខចំនួនអង្គការមិនមែនរដ្ឋាភិបាល (NGO) និងសមាគមន៍ដែលបានចុះបញ្ជីនៅកម្ពុជា ដោយមានប្រមាណ ៣.០០០ សមាគមន៍ និង ៣.៥០០ NGO សរុបជាង ៦.៥០០ កំពុងធ្វើការទូទាំងប្រទេស។ លោកបានគូសរំលេចថា ភាគច្រើននៃអង្គការទាំងនេះជា «ដៃគូដ៏ល្អ» របស់រដ្ឋាភិបាល ហើយរដ្ឋាភិបាលគ្មានហេតុផលអ្វីត្រូវបិទសិទ្ធិពួកគេឡើយ។ ផ្ទុយទៅវិញ លោកបានបញ្ជាក់ថា៖ «មានតែសូមជួយឱ្យថែមទៀត ជួយឱ្យរីកចម្រើនថែមទៀត»។

Phnom Penh Post ដដែលក៏បានដកស្រង់សម្តីលោកដែលច្រានចោលសារព័ត៌មានមួយចំនួនថា៖ «មានការយល់ច្រឡំ ជាពិសេសការលើកឡើងក្នុងបណ្ដាសារព័ត៌មានមួយចំនួន ចោទថា រដ្ឋាភិបាលមិនលើកទឹកចិត្តទៅដល់អង្គការសង្គមស៊ីវិល បិទសេរីភាព បិទស្អីៗមិនឱ្យគេធ្វើការ។ អត់ទេ! រឿងអង្គការមួយក្ដាប់តូច រឿងបញ្ចេញមតិ រឿងអីណា ជារឿងមួយ ធ្វើសកម្មភាពនៅក្នុងច្បាប់»។ លោកបានសង្កត់ធ្ងន់ថា ទោះបីមានអង្គការខ្លះត្រូវបានបិទ ប៉ុន្តែមូលហេតុគឺដោយសារការមិនគោរពច្បាប់ មិនមែនដោយសារគោលនយោបាយរដ្ឋាភិបាលឡើយ។

ដោយឡែក Khmer Times បានរាយការណ៍ថា លោកនាយករដ្ឋមន្ត្រីក៏បានលើកឡើងពីនិយមន័យទូលំទូលាយនៃសិទ្ធិមនុស្ស ដោយថ្លែងថា សិទ្ធិទទួលបានការអប់រំ និងសេវាសុខភាព គឺជាផ្នែកដ៏សំខាន់នៃសិទ្ធិមនុស្ស មិនមែនមានតែសេរីភាពបញ្ចេញមតិប៉ុណ្ណោះទេ។ លោកបានសរសើរអង្គការសង្គមស៊ីវិលជាច្រើនដែលបានចូលរួមយ៉ាងសកម្មក្នុងវិស័យទាំងនេះ ហើយអំពាវនាវឱ្យពួកគេបន្តកិច្ចខិតខំប្រឹងប្រែងដើម្បីជួយដល់ការអភិវឌ្ឍសង្គម និងបណ្ដុះបណ្ដាលធនធានមនុស្ស។