នៅថ្ងៃទី ៤ ខែកក្កដា ឆ្នាំ ២០២៦ ក្រសួងមហាផ្ទៃឥណ្ឌា (MHA) បានប្រកាសជាផ្លូវការនូវការចុះបញ្ជីបុគ្គលចំនួន ២៣ នាក់ជា "ភេរវករបុគ្គល" ក្រោមច្បាប់ប្រឆាំងភេរវកម្មរបស់ខ្លួន។ តាមការរាយការណ៍របស់ Deutsche Welle បុគ្គលទាំងនេះគឺជាជនជាតិប៉ាគីស្ថានដែលមានមូលដ្ឋាននៅក្នុងប្រទេសប៉ាគីស្ថាន។ ខណៈដែលកាសែត Times of India បានបញ្ជាក់ថា ក្នុងចំណោមពួកគេ មាន ១៧ នាក់មកពីប៉ាគីស្ថាន និង ៦ នាក់ទៀតជាជនជាតិឥណ្ឌា ដោយភាគច្រើនមានដើមកំណើតចេញពីតំបន់កាស្មៀរក្រោមការកាន់កាប់របស់ប៉ាគីស្ថាន (Pakistan-occupied Kashmir)។

យោងតាម Times of India រដ្ឋមន្ត្រីក្រសួងមហាផ្ទៃឥណ្ឌា លោក Amit Shah បានថ្លែងថា បុគ្គលដែលត្រូវបានចុះបញ្ជីទាំងនេះ ពាក់ព័ន្ធនឹងសកម្មភាពប្រឆាំងនឹងប្រទេសឥណ្ឌា រួមមានការវាយប្រហារភេរវកម្ម ការជ្រើសរើសសមាជិក ក៏ដូចជាការធ្វើចារកម្មដើម្បីរៀបចំការវាយប្រហារនាពេលអនាគត។

តាមរបាយការណ៍ដដែលនេះ បុគ្គលទាំង ២៣ នាក់ ត្រូវបានគេចាត់ទុកថាជាសមាជិក ឬមានទំនាក់ទំនងជាមួយក្រុមប្រដាប់អាវុធ Lashkar-e-Taiba និង Jaish-e-Mohammed។ ការវាយប្រហារធំៗដែលបានភ្ជាប់ទៅនឹងពួកគេ រួមមាន ការវាយប្រហារលើមូលដ្ឋានទ័ពអាកាស Pathankot និងការបំផ្ទុះនៅហាងកាហ្វេ Rameshwaram ដែលបង្កឱ្យមានមនុស្សស្លាប់ និងរបួសជាច្រើននាក់កន្លងមក។

Times of India បានរាយការណ៍បន្ថែមថា សកម្មភាពនេះគូសបញ្ជាក់ពីជំហរដ៏ម៉ឺងម៉ាត់របស់រដ្ឋាភិបាលឥណ្ឌាក្នុងការប្រយុទ្ធប្រឆាំងនឹងអំពើភេរវកម្ម ហើយជាផ្នែកមួយនៃកិច្ចខិតខំប្រឹងប្រែងរបស់ខ្លួនដើម្បីទប់ស្កាត់ការគំរាមកំហែងនានា។