រដ្ឋាភិបាលឥណ្ឌាបានបញ្ជាឲ្យក្រុមហ៊ុន Meta Platforms Inc. ដកចេញនូវរាល់ខ្លឹមសារពាក់ព័ន្ធនឹងការកេងកេងផ្លូវភេទកុមារចេញពីគ្រប់វេទិការបស់ខ្លួន ជាពិសេស Instagram នេះបើយោងតាមរបាយការណ៍របស់ Bloomberg និង The Straits Times នៅថ្ងៃទី ៥ កក្កដា ឆ្នាំ ២០២៦។ ជាមួយគ្នានេះ កាសែត The Straits Times កាលពីថ្ងៃទី ៤ កក្កដា ក៏បានរាយការណ៍ថា រដ្ឋាភិបាលឥណ្ឌាមានគម្រោងកោះហៅមន្ត្រីជាន់ខ្ពស់របស់ Meta ឲ្យមកបំភ្លឺជុំវិញការរកឃើញខ្លឹមសារអាសអាភាសកុមារនៅលើវេទិកានេះផងដែរ។

យោងតាម The Straits Times ស្ថាប័នព័ត៌មាន BBC បានចេញផ្សាយរបាយការណ៍ស៊ើបអង្កេតមួយនៅថ្ងៃទី ៣ កក្កដា ដែលបានបង្ហាញថា ពាណិជ្ជកម្មមួយចំនួនដែលផ្សព្វផ្សាយនៅលើ Instagram ក្នុងប្រទេសឥណ្ឌា បានប្រើប្រាស់ខ្លឹមសារកេងកេងផ្លូវភេទកុមារ។ កាសែតដដែលបានបន្ថែមថា ការរកឃើញនេះបានធ្វើឲ្យអាជ្ញាធរឥណ្ឌាមានការព្រួយបារម្ភ ហើយបានចាត់វិធានការយ៉ាងឆាប់រហ័សត្រឹមរយៈពេល ២ ថ្ងៃប៉ុណ្ណោះ។

Bloomberg បានរាយការណ៍ថា ក្រសួងព័ត៌មានវិទ្យានិងអេឡិចត្រូនិកឥណ្ឌាបានចេញលិខិតជូនដំណឹងជាផ្លូវការទៅកាន់ថ្នាក់ដឹកនាំក្រុមហ៊ុន Meta ដោយទាមទារឲ្យដកចេញនូវរាល់ខ្លឹមសារអាសអាភាសកុមារពីគ្រប់វេទិការបស់ខ្លួន រួមទាំង Instagram ផងដែរ។ Bloomberg បានពណ៌នាសកម្មភាពនេះថាជាបញ្ហាបទប្បញ្ញត្តិចុងក្រោយបង្អស់ដែលក្រុមហ៊ុនបច្ចេកវិទ្យាអាមេរិកដ៏ធំមួយនេះកំពុងប្រឈមមុខនៅក្នុងទីផ្សារឥណ្ឌា។