តាម UKMTO នាវាដឹកប្រេងមួយកំពុងធ្វើដំណើរទៅទិសខាងត្បូង ត្រូវបានវាយប្រហារដោយគ្រាប់មិនស្គាល់បាញ់ចំផ្នែកឆ្វេង បណ្តាលឲ្យឆេះ។ ហេតុការណ៍នេះកើតឡើងនៅចម្ងាយ ៨ ម៉ាយសមុទ្រខាងកើតទីក្រុងលីម៉ា (Limah) ក្បែរច្រកសមុទ្រហ័រមូស កាលពីថ្ងៃទី ៧ ខែកក្កដា ឆ្នាំ២០២៦។ UKMTO បញ្ជាក់ថាគ្មានអ្នកស្លាប់ ឬរបួស ហើយគ្មានការខូចខាតបរិស្ថានឡើយ។ Shafaq News រាយការណ៍ថា នាវាដែលសង្ស័យថារងការវាយប្រហារមួយគ្រឿង គឺនាវាដឹកឧស្ម័នរាវ Al Rekayyat ជាកម្មសិទ្ធិរបស់ក្រុមហ៊ុន Nakilat ប្រទេសកាតា។

កាសែត The New York Times និងគេហទំព័រ Axios បានរាយការណ៍ដោយដកស្រង់សម្ដីមន្ត្រីសហរដ្ឋអាមេរិកថា កងកម្លាំងអ៊ីរ៉ង់បានបាញ់កាំជ្រួចយ៉ាងហោចណាស់ពីរគ្រាប់សំដៅនាវាពាណិជ្ជកម្មក្នុងតំបន់នេះ ដោយនាវាមួយគ្រឿងទៀតក៏ត្រូវបានខូចខាតយ៉ាងដំណំ ប៉ុន្តែគ្មានអ្នកស្លាប់ឡើយ។ យ៉ាងណាមិញ កាសែត Dawn បានរាយការណ៍ថា ទីភ្នាក់ងារ AFP មិនអាចផ្ទៀងផ្ទាត់ដោយឯករាជ្យបាននូវរបាយការណ៍របស់ Axios ឡើយ ហើយក្រសួងការពារជាតិសហរដ្ឋអាមេរិកក៏មិនទាន់បានឆ្លើយតបទៅនឹងសំណើសុំអត្ថាធិប្បាយរបស់ AFP ដែរ។

ចំណែកឯទូរទស្សន៍រដ្ឋអ៊ីរ៉ង់ (IRIB) នៃរដ្ឋាភិបាលអ៊ីរ៉ង់ បានចេញផ្សាយរបាយការណ៍ខុសគ្នាថា នាវាដឹកឧស្ម័នបានត្រូវវាយប្រហារបន្ទាប់ពីវាមិនបានធ្វើតាមការព្រមានពីកងនាវាអ៊ីរ៉ង់ តែពុំបានអះអាងដោយផ្ទាល់ថាជាសកម្មភាពរបស់ភាគីអ៊ីរ៉ង់ឡើយ។ តាមកាសែត The New York Times ដដែល មន្ត្រីរដ្ឋាភិបាលអ៊ីរ៉ង់មិនទាន់ចេញមុខធ្វើអត្ថាធិប្បាយជាសាធារណៈអំពីការវាយប្រហារនេះនៅឡើយទេ។

ការវាយប្រហារខាងលើកើតឡើងខណៈដែលកិច្ចព្រមព្រៀងឈប់បាញ់បណ្ដោះអាសន្នរយៈពេលមួយសប្តាហ៍រវាងសហរដ្ឋអាមេរិកនិងអ៊ីរ៉ង់ទើបតែផុតកំណត់ ហើយកិច្ចខិតខំប្រឹងប្រែងដើម្បីសម្រេចបានកិច្ចព្រមព្រៀងសន្តិភាពយូរអង្វែងកំពុងតែជួបប្រទះភាពមិនច្បាស់លាស់។ តាម Shafaq News រដ្ឋមន្ត្រីការបរទេសអ៊ីរ៉ង់លោក Abbas Araghchi បានថ្លែងក្រោយកើតហេតុថា “ការចរចាស្ដីពីកិច្ចព្រមព្រៀងចុងក្រោយនឹងមិនចាប់ផ្ដើមទេ ប្រសិនបើការគំរាមកំហែងនៅតែបន្ត។ សូមគោរពហត្ថលេខារបស់អ្នក”។ ច្រកសមុទ្រហ័រមូសជាផ្លូវដឹកជញ្ជូនថាមពលដ៏សំខាន់របស់ពិភពលោក ដោយប្រេងឆៅប្រមាណ ២០ លានបារ៉ែលបានឆ្លងកាត់ច្រកនេះជារៀងរាល់ថ្ងៃ តាមទិន្នន័យរបស់ EIA ដកស្រង់ដោយ Dawn។