កាសែត South China Morning Post បានរាយការណ៍ថា កងទ័ពជើងទឹកនៃសាធារណរដ្ឋប្រជាមានិតចិន និងសហព័ន្ធរុស្ស៊ី បានចាប់ផ្តើមសមយុទ្ធរួមគ្នា ដែលមានឈ្មោះថា Joint Sea-2026 នៅឯកំពង់ផែទីក្រុងឈីងតាវ ភាគខាងកើតប្រទេសចិន កាលពីថ្ងៃច័ន្ទសប្តាហ៍នេះ។ សមយុទ្ធនេះត្រូវបានរាយការណ៍ថាផ្តោតសំខាន់ទៅលើការជួយសង្គ្រោះនាវាមុជទឹក ដោយទីក្រុងប៉េកាំងបានបង្ហាញក្តីសង្ឃឹមថា ពួកគេនឹងអាចរៀនសូត្រពីបទពិសោធន៍ប្រតិបត្តិការជាក់ស្តែងរបស់រុស្ស៊ី ដែលជាដៃគូយុទ្ធសាស្ត្ររបស់ខ្លួន។

បន្ថែមពីនេះ South China Morning Post ក៏បានគូសបញ្ជាក់ដែរថា សមយុទ្ធ Joint Sea-2026 នេះ គឺជាផ្នែកនៃសមយុទ្ធកងទ័ពជើងទឹកប្រចាំឆ្នាំ ដែលបានចាប់ផ្តើមធ្វើឡើងជាលើកដំបូងកាលពីឆ្នាំ២០១២ ហើយបានឆ្លុះបញ្ចាំងឱ្យឃើញពីការពង្រឹងកិច្ចសហប្រតិបត្តិការយោធារវាងទីក្រុងប៉េកាំង និងមូស្គូ។ ការផ្តោតលើការជួយសង្គ្រោះនាវាមុជទឹកនេះ កើតឡើងចំពេលដែលការប្រកួតប្រជែងក្រោមផ្ទៃសមុទ្រកំពុងកើនឡើង នេះបើយោងតាមកាសែតដដែល។

ដោយឡែក សារព័ត៌មាន Al Jazeera បានរាយការណ៍ថា សមយុទ្ធរួមគ្នានេះ នឹងប្រព្រឹត្តទៅចាប់ពីថ្ងៃច័ន្ទ រហូតដល់ថ្ងៃទី១៣ ខែកក្កដា ហើយបន្ទាប់ពីបញ្ចប់ កងនាវាចម្បាំងទាំងពីរនឹងធ្វើដំណើរល្បាតរួមគ្នានៅក្នុងមហាសមុទ្រប៉ាស៊ីហ្វិកបន្តទៀត។

សារព័ត៌មានឯករាជ្យ Cambodianess ប្រចាំកម្ពុជា ក៏បានចុះផ្សាយដំណឹងអំពីសមយុទ្ធកងទ័ពជើងទឹករវាងចិន និងរុស្ស៊ីនេះផងដែរ ដោយបានបញ្ជាក់ពីកាលបរិច្ឆេទនិងទីតាំងនៃសមយុទ្ធ។