កាសែត South China Morning Post (SCMP) និង New Straits Times (NST) បានចុះផ្សាយរួមគ្នានៅថ្ងៃទី ១៩ កក្កដា ឆ្នាំ២០២៦ ថា មជ្ឈមណ្ឌលដែលគេស្គាល់ថា មជ្ឈមណ្ឌលម៉ៃឃែល (Michael Centre) ស្ថិតនៅក្បែរផ្លូវធំដ៏មមាញឹកមួយក្នុងតំបន់មេត្រូម៉ានីល។ មជ្ឈមណ្ឌលនេះបានបង្កើតឡើងក្នុងគោលបំណងបណ្ដុះបណ្ដាលមិនត្រឹមតែអ្នកបួសកាតូលិកហ្វីលីពីនប៉ុណ្ណោះទេ ប៉ុន្តែថែមទាំងអ្នកបួសមកពីប្រទេសផ្សេងៗក្នុងតំបន់អាស៊ីឲ្យមានជំនាញក្នុងការបណ្តេញវិញ្ញាណផងដែរ។

SCMP បានរៀបរាប់បន្ថែមថា នៅខាងក្នុងអគារមជ្ឈមណ្ឌលមានបន្ទប់ស្នាក់នៅរៀបចំយ៉ាងស្អាតសម្រាប់អ្នកបួសដែលធ្វើដំណើរមកពីចម្ងាយ ហើយផ្លូវដើរដែលមានពន្លឺកក់ក្ដៅដឹកនាំទៅកាន់វិហារមួយ។ ពិធីបណ្តេញវិញ្ញាណដែលមានអាយុកាលប្រមាណ ៤០០ ឆ្នាំ ត្រូវបានគេធ្វើឡើងនៅទីនេះ។ នៅជញ្ជាំងម្ខាងនៃវិហារមានការតម្កល់វត្ថុសក្ការៈពិសិដ្ឋ រីឯជញ្ជាំងម្ខាងទៀតមានកញ្ចក់មើលបានតែម្ខាង សម្រាប់ឲ្យសាច់ញាតិ និងអ្នកហាត់ការអាចសង្កេតមើលដោយមិនរំខានដល់ពិធី។

ដោយឡែក កាសែត The Straits Times បានលើកឡើងពីតួលេខរបស់អង្គការសុខភាពពិភពលោក (WHO) ដែលបង្ហាញថា នៅហ្វីលីពីនមានគ្រូពេទ្យវិកលចរិកត្រឹមតែ ១ នាក់ប៉ុណ្ណោះសម្រាប់ប្រជាជន ២០០,០០០ នាក់។ របាយការណ៍នេះក៏បានចង្អុលបង្ហាញថា វិបត្តិខ្វះខាតសេវាសុខភាពផ្លូវចិត្តបែបនេះបានធ្វើឲ្យប្រជាជនមួយចំនួនធំងាកទៅរកដំណោះស្រាយខាងជំនឿ ដូចជាការបណ្តេញវិញ្ញាណជាដើម។

SCMP បានបន្ថែមថា ករណីដែលតម្រូវឲ្យមានការធ្វើពិធីបណ្តេញវិញ្ញាណកំពុងកើនឡើងជាបន្តបន្ទាប់ ដែលជំរុញឲ្យមានតម្រូវការខ្ពស់ចំពោះអ្នកបួសដែលមានជំនាញក្នុងវិស័យនេះ។ បច្ចុប្បន្ន មជ្ឈមណ្ឌលនេះកំពុងទាក់ទាញសិក្ខាកាមមកពីប្រទេសជាច្រើនក្នុងទ្វីបអាស៊ី និងដើរតួនាទីយ៉ាងសំខាន់ក្នុងការបំពេញចន្លោះខ្វះខាតនេះ។