នៅ ថ្ងៃទី ២២ ខែ កក្កដា ឆ្នាំ ២០២៦ ក្នុង ឱកាស កិច្ចប្រជុំ រដ្ឋមន្ត្រី ការបរទេស អាស៊ាន លើក ទី ៥៩ នៅ ទីក្រុង ម៉ានីល ប្រទេស ហ្វីលីពីន លោកស្រី ប៉េនី វ៉ុង រដ្ឋមន្ត្រី ការបរទេស អូស្ត្រាលី បាន ព្រមាន ប្រទេស ចិន ថា អូស្ត្រាលី និង ប្រទេស ជិតខាង នឹង មិន អនុញ្ញាត ឲ្យ គេ ធ្វើ ការ បំភិត បំភ័យ ដោយ សកម្មភាព « ញុះញង់ » របស់ ចិន នោះ ទេ បើ តាម ការ រាយការណ៍ របស់ កាសែត The Guardian ។

លោកស្រី វ៉ុង បាន លើកឡើង ពី ការ ព្រួយបារម្ភ ដោយផ្ទាល់ ទៅកាន់ សមភាគី ចិន អំពី ការ សាកល្បង មីស៊ីល ដែល អាច ផ្ទុក ក្បាលគ្រាប់ នុយក្លេអ៊ែរ និង អាច បាញ់ ចេញ ពី នាវា មុជទឹក នៅ មហាសមុទ្រ ប៉ាស៊ីហ្វិក ខាង ត្បូង កាលពី ពេល ថ្មីៗ នេះ តាម សារព័ត៌មាន Hong Kong Free Press ។ លោកស្រី បាន ហៅ ការ សាកល្បង នោះ ថា ជា សកម្មភាព « បង្ក ឲ្យ មាន អស្ថិរភាព » និង បាន បរិហារ ផង ដែរ អំពី « អំពើ គ្រោះថ្នាក់ » របស់ ចិន បន្ទាប់ ពី មាន ការ ប៉ះទង្គិច គ្នា រវាង នាវិក ហ្វីលីពីន និង ចិន នៅ ក្នុង ដែន សមុទ្រ ដែល មាន ជម្លោះ ។

ទន្ទឹម នឹង នេះ លោកស្រី វ៉ុង ក៏ បាន និយាយ ថា តំបន់ ត្រូវ ប្រឈម មុខ នឹង ជម្រើស មួយ អំពី ការ ឆ្លើយតប របស់ ខ្លួន ចំពោះ « ការ ឈ្លានពាន » នៅ សមុទ្រ ចិន ខាង ត្បូង តាម ការ រាយការណ៍ របស់ កាសែត The Straits Times ។ កាសែត នេះ បាន បន្ត ថា ក្រសួង ការបរទេស ចិន បាន ឆ្លើយតប ថា អូស្ត្រាលី មិន មែន ជា ភាគី ពាក់ព័ន្ធ នៅ ក្នុង បញ្ហា សមុទ្រ ចិន ខាង ត្បូង នោះ ទេ ។

ក្រៅ ពី បញ្ហា ចិន លោកស្រី វ៉ុង ក៏ បាន ព្រមាន មេដឹកនាំ ពិភពលោក ប្រឆាំង នឹង ការ ដាក់ ពន្ធ លើ ច្រក សមុទ្រ ហ័រមូស ដែល មាន ទាំង អ៊ីរ៉ង់ និង សហរដ្ឋ អាមេរិក គំរាម ធ្វើ ឡើង ចំពេល ជម្លោះ អូសបន្លាយ នេះ តាម The Guardian ។