ព្រះរាជអាជ្ញាក្រុងសេអ៊ូលបានស្នើសុំឱ្យតុលាការកាត់ទោសម្ចាស់ភោជនីយដ្ឋានមួយដែលទទួលបានផ្កាយមីហ្សឺឡាំង ឱ្យជាប់ពន្ធនាគាររយៈពេល១ឆ្នាំ និងពិន័យជាប្រាក់ចំនួន២០លានវ៉ុន សម្រាប់ក្រុមហ៊ុនដែលគ្រប់គ្រងភោជនីយដ្ឋាននេះ តាមការរាយការណ៍របស់ The Guardian និង South China Morning Post។ ការចោទប្រកាន់បានធ្វើឡើងកាលពីថ្ងៃចន្ទ ក្រោយពីមន្ត្រីរកឃើញថាភោជនីយដ្ឋាននេះបានប្រើប្រាស់ស្រមោចជាគ្រឿងតុបតែងលើមុខម្ហូប ដែលជាទង្វើខុសនឹងច្បាប់សុវត្ថិភាពចំណីអាហារកូរ៉េខាងត្បូង។

យោងតាមច្បាប់នេះ មានតែសត្វល្អិតចំនួន១០ប្រភេទប៉ុណ្ណោះដែលត្រូវបានអនុញ្ញាតឱ្យប្រើជាអាហារសម្រាប់មនុស្ស ដូចជាកណ្តូប និងដង្កូវនាង ហើយស្រមោចមិនស្ថិតក្នុងបញ្ជីនោះឡើយ ដូចដែលកាសែត The Straits Times បានរាយការណ៍។ BBC បានរាយការណ៍ថា មន្ត្រីបានរកឃើញថាភោជនីយដ្ឋាននេះបានប្រើស្រមោចប្រហែល ៤៩ ០០០ក្បាល ក្នុងមុខម្ហូបជាច្រើនក្នុងរយៈពេល ៤ឆ្នាំ។ ជាក់ស្តែង មុខម្ហូបមួយក្នុងចំណោមនោះគឺបង្អែមសូបេ (sorbet) ដែលគេប្រើសម្រាប់សម្អាតរស់ជាតិ ហើយត្រូវបានតុបតែងដោយស្រមោចខ្មៅក្រៀម តាមការរាយការណ៍របស់ South China Morning Post។

ម្ចាស់ភោជនីយដ្ឋានរូបនេះបានអះអាងថា ការបន្ថែមស្រមោចគឺដើម្បីផ្តល់រសជាតិជូរដល់មុខម្ហូប។ រហូតមកដល់បច្ចុប្បន្ន អត្តសញ្ញាណរបស់ម្ចាស់ និងឈ្មោះភោជនីយដ្ឋានមិនត្រូវបានបង្ហាញជាសាធារណៈឡើយ។ សំណុំរឿងនេះកំពុងស្ថិតនៅក្នុងដំណើរការតុលាការ ហើយមិនទាន់មានសាលក្រមជាផ្លូវការនៅឡើយទេ។