យោងតាមការរាយការណ៍របស់សារព័ត៌មាន South China Morning Post (SCMP) និង The Straits Times កងទ័ពរំដោះប្រជាជនចិន (PLA) បានចាប់ផ្តើមសមយុទ្ធបាញ់គ្រាប់ពិតរយៈពេលពីរថ្ងៃនៅក្នុងច្រកសមុទ្រតៃវ៉ាន់ នៅព្រឹកថ្ងៃព្រហស្បតិ៍ ទី២៣ ខែកក្កដា ឆ្នាំ២០២៦។ សមយុទ្ធនេះនឹងប្រព្រឹត្តទៅចាប់ពីម៉ោង៦ព្រឹកដល់ម៉ោង៦ល្ងាច ជារៀងរាល់ថ្ងៃ ហើយបញ្ចប់នៅថ្ងៃសុក្រ ទី២៤ ខែកក្កដា ដោយផ្តោតសំខាន់ទៅលើតំបន់ជុំវិញកោះដុងសាន ដែលស្ថិតក្នុងខេត្តហ្វូជៀន ភាគអាគ្នេយ៍ប្រទេសចិន។ ច្រកសមុទ្រតៃវ៉ាន់ជាផ្លូវទឹកដ៏សំខាន់ខាងយុទ្ធសាស្ត្រ និងជាកន្លែងដែលមានការប្រកួតប្រជែងផ្នែកយោធាជាញឹកញាប់រវាងប្រទេសចិន និងកោះតៃវ៉ាន់។

ការព្រមានសុវត្ថិភាពនាវាចរណ៍ត្រូវបានរដ្ឋបាលសុវត្ថិភាពដែនសមុទ្រនៃក្រុងប៉េកាំងចេញផ្សាយកាលពីថ្ងៃពុធ ទី២២ ខែកក្កដា ដើម្បីជូនដំណឹងដល់នាវាទាំងអស់ឱ្យចៀសវាងតំបន់គ្រោះថ្នាក់។ តាមរបាយការណ៍របស់ SCMP សមយុទ្ធយោធានេះក៏ស្របពេលជាមួយការបញ្ចប់នៃការស្ទង់មត្រែងធនធានជលផលរបស់ចិននៅដែនទឹកភាគខាងកើតនៃកោះតៃវ៉ាន់ ដែលធ្វើឡើងដើម្បីប្រមូលទិន្នន័យអំពីស្តុកត្រី និងធនធានសមុទ្រក្នុងតំបន់។

សារព័ត៌មាន Rappler នៃប្រទេសហ្វីលីពីនបានរាយការណ៍ថា ព័ត៌មាននេះត្រូវបានផ្សព្វផ្សាយតែមួយថ្ងៃប៉ុណ្ណោះ បន្ទាប់ពីជំនួបពិភាក្សារវាងរដ្ឋមន្រ្តីការបរទេសចិន លោក វ៉ាង យី និងរដ្ឋមន្រ្តីការបរទេសសហរដ្ឋអាមេរិក លោក ម៉ាកូ រូប៊ីអូ នៅក្រៅកិច្ចប្រជុំរដ្ឋមន្រ្តីការបរទេសអាស៊ាន ដែលធ្វើឡើងនៅទីក្រុងម៉ានីល។

យោងតាម SCMP សមយុទ្ធរបស់ PLA ជាទូទៅតែងតែកើនឡើងដល់កម្រិតខ្ពស់នៅពាក់កណ្តាល និងចុងខែកក្កដា ជារៀងរាល់ឆ្នាំ។ កងទ័ពចិនតែងប្រើរដូវកាលនេះដើម្បីហ្វឹកហាត់ក្រោមលក្ខខណ្ឌអាកាសធាតុដ៏លំបាក រួមទាំងកម្តៅខ្លាំង ដើម្បីធានាថាកម្លាំងទ័ពអាចប្រតិបត្តិការបានគ្រប់កាលៈទេសៈ។ ការធ្វើសមយុទ្ធបន្តបន្ទាប់នេះគឺជាផ្នែកមួយនៃកម្មវិធីធ្វើទំនើបកម្មយោធាដ៏ទូលំទូលាយរបស់ប្រទេសចិន។