France 24 ដែលជាទូរទស្សន៍ព័ត៌មានបារាំង បានរាយការណ៍ថា កាលពីព្រឹកព្រលឹមថ្ងៃទី២៨ ខែកក្កដា ឆ្នាំ២០២៦ អាជ្ញាធរអ៊ីរ៉ង់បានធ្វើការប្រហារជីវិតអ្នកតវ៉ាពីរនាក់ជាសាធារណៈនៅទីលានអាលីខានី ក្នុងទីក្រុងអ៊ីស្វាហាន់។ នៅកន្លែងកើតហេតុ គេបានឃើញវេទិកាមួយសម្រាប់ការសម្លាប់ ហើយមានប្រជាពលរដ្ឋជាច្រើនរយនាក់បានមកប្រមូលផ្តុំគ្នា។ ផ្ទុយទៅនឹងការរំពឹងទុក ពួកគេមិនបានសាទរចំពោះការប្រហារជីវិតនេះឡើយ ប៉ុន្តែបែរជានាំគ្នាស្រែកពាក្យស្លោកប្រឆាំងនឹងកងកម្លាំងប៉ូលីសវិញ។ សកម្មភាពនេះបានជំរុញឲ្យកម្លាំងប្រឆាំងកុបកម្មចូលទៅបំបែកហ្វូងមនុស្សភ្លាមៗ បើតាមសារព័ត៌មាននេះ។

ចំណែកកាសែត New York Times របស់សហរដ្ឋអាមេរិក បានរាយការណ៍ថា ក្រុមសកម្មជនសិទ្ធិមនុស្សបានអះអាងថា រដ្ឋាភិបាលអ៊ីរ៉ង់កំពុងបង្កើនការប្រហារជីវិតលើអ្នកតវ៉ាយ៉ាងឆាប់រហ័ស។ ការប្រហារជីវិតចុងក្រោយនេះបានបង្កជាការតវ៉ាជាសាធារណៈ ស្របពេលដែលវីដេអូនានាដែលបង្ហាញពីការប្រមូលផ្តុំគ្នារបស់មហាជនបានលេចចេញលើបណ្តាញអ៊ីនធឺណិត តាមកាសែតនេះ។

គេហទំព័រ Iran International បានរាយការណ៍ថា ការសម្លាប់អ្នកតវ៉ាពីរនាក់បន្ថែមទៀតនៅព្រឹកថ្ងៃអង្គារ បានបង្កឲ្យមានទុក្ខសោក កំហឹង និងការប្រឆាំងពាសពេញប្រទេសអ៊ីរ៉ង់។ ប្រជាជនជាច្រើនបាននិយាយថា ការព្យួរកនេះបានពង្រឹងចិត្តរបស់ពួកគេក្នុងការតស៊ូប្រឆាំងរបបសាធារណរដ្ឋអ៊ីស្លាម ជាជាងធ្វើឲ្យពួកគេទន់ជ្រាយ។