ការប៉ះទង្គិចគ្នារវាងកងកម្លាំងសហព័ន្ធ និងក្រុមឧទ្ទាមរណសិរ្សរំដោះប្រជាជនទីហ្គ្រាយ (TPLF) បានផ្ទុះឡើងកាលពីថ្ងៃសៅរ៍កន្លងមកនេះ ដែលបណ្តាលឱ្យប្រជាជនស្លូតត្រង់រាប់រយនាក់បង្ខំចិត្តរត់ចោលទីជម្រករបស់ពួកគេ។ តាមការរាយការណ៍របស់ BBC និងគេហទំព័រព័ត៌មាន AllAfrica ដែលបានដកស្រង់ពីវិទ្យុបារាំង RFI ប្រជាជនមួយចំនួនបានធ្វើដំណើរឆ្ពោះទៅកាន់ប្រទេសស៊ូដង់ ដែលជាប្រទេសកំពុងជួបនឹងសង្គ្រាមស៊ីវិលយ៉ាងធ្ងន់ធ្ងរផងដែរ។

របាយការណ៍របស់ AllAfrica បានឱ្យដឹងទៀតថា ភាគីទាំងសងខាងនៅក្នុងជម្លោះនេះ គឺកងកម្លាំងសហព័ន្ធអេត្យូពី និងក្រុម TPLF បានផ្លាស់ប្តូរការចោទប្រកាន់គ្នាទៅវិញទៅមកថាជាអ្នកស្វែងរកការបង្កើតជម្លោះឡើងវិញ។

ចំណែក BBC បានរាយការណ៍ថា មានការព្រួយបារម្ភយ៉ាងខ្លាំងក្នុងចំណោមអ្នកសង្កេតការណ៍ថា ការវាយប្រយុទ្ធគ្នាថ្មីនេះអាចនឹងធ្វើឱ្យអេត្យូពីធ្លាក់ចូលទៅក្នុងសង្គ្រាមស៊ីវិលពេញលេញម្តងទៀត ពីព្រោះកិច្ចព្រមព្រៀងសន្តិភាពដែលធ្លាប់បានចុះហត្ថលេខាកន្លងមកមិនទាន់ត្រូវបានអនុវត្តឱ្យបានពេញលេញនៅឡើយទេ។

ស្ថានភាពនៅតាមតំបន់ព្រំដែននៅតែមានភាពតានតឹង ហើយលំហូរជនភៀសខ្លួនទៅកាន់ស៊ូដង់កំពុងបន្តកើតមានឡើង ខណៈដែលប្រទេសទាំងពីរមិនទាន់ចេញសេចក្តីថ្លែងការណ៍ជាផ្លូវការអំពីការបញ្ឈប់ការប្រយុទ្ធនៅឡើយ។