តាមការរាយការណ៍របស់កាសែត South China Morning Post (SCMP) កាលពីថ្ងៃពុធ ទី១៩ ខែសីហា ឆ្នាំ ២០២៦ ក្រុមហ៊ុន LandSpace ដែលមានមូលដ្ឋាននៅប្រទេសចិន បានបាញ់បង្ហោះរ៉ុក្កែត Zhuque-3 ទៅកាន់ទីអវកាសដោយជោគជ័យ ហើយបានប្រមូលផ្នែកទីមួយរបស់រ៉ុក្កែតនេះមកវិញ ដែលត្រូវបានចាត់ទុកថាជាការទម្លាយរបកគំហើញមួយក្នុងកិច្ចខិតខំរបស់ចិន ដើម្បីអភិវឌ្ឍរ៉ុក្កែតដែលអាចប្រើប្រាស់ឡើងវិញបាន។ បច្ចេកវិទ្យាប្រភេទនេះអាចជួយកាត់បន្ថយថ្លៃចំណាយលើការបាញ់បង្ហោះទៅកាន់ទីអវកាសយ៉ាងច្រើន តាមប្រភពដដែល។

តាមការរាយការណ៍របស់ SCMP ផ្នែកទីមួយនៃរ៉ុក្កែតដែលមានកម្ពស់ ៦៦ ម៉ែត្រ ឬប្រហែល ២១៧ ហ្វីត បានចុះចតនៅស្រុក Minqin ខេត្ត Gansu ដែលស្ថិតនៅភាគពាយ័ព្យនៃប្រទេសចិន បន្ទាប់ពីការហោះហើររយៈពេល ៨ នាទី ដែលបានបញ្ជូនផ្កាយរណបអ៊ីនធឺណិតឈ្មោះ Honghu-3 ទៅកាន់ទីអវកាស។ ចំណែកការបាញ់បង្ហោះវិញ បានធ្វើឡើងចេញពីមជ្ឈមណ្ឌលបាញ់បង្ហោះផ្កាយរណប Jiuquan ដែលមានចម្ងាយ ៣៩០ គីឡូម៉ែត្រពីទីតាំងចុះចត នេះបើតាមប្រភពដដែល។

កាសែត The Hindu របស់ឥណ្ឌាបានរាយការណ៍ថា នេះជាលើកដំបូងហើយដែលប្រទេសចិនបានប្រមូលផ្នែករ៉ុក្កែតមកវិញនៅលើគោកដោយជោគជ័យ។ ប៉ុន្តែ សារព័ត៌មាន NDTV របស់ឥណ្ឌាបានបញ្ជាក់ថា ទោះបីជាការប្រមូលមកវិញលើគោកនេះជាលើកទីមួយក៏ដោយ ក៏វាជាលើកទីពីរហើយដែលចិនបានប្រមូលផ្នែករ៉ុក្កែតមកវិញ បន្ទាប់ពីការប្រមូលមកវិញដោយជោគជ័យនៅលើវេទិកាមួយក្នុងសមុទ្រកាលពីខែកក្កដាកន្លងទៅ។ ដោយឡែក កាសែត SCMP បានដាក់ចំណងជើងព័ត៌មាននេះថា ចិនបានចូលរួមជាមួយក្រុមហ៊ុន SpaceX របស់លោក Musk ក្នុងការទម្លាយរបកគំហើញរ៉ុក្កែតដែលអាចប្រើប្រាស់ឡើងវិញបាន។

ជាផ្ទៃខាងក្រោយនៃរឿងនេះ កាសែត The Hindu បានរាយការណ៍ថា ក្រុមហ៊ុន SpaceX របស់លោក Elon Musk និងក្រុមហ៊ុន Blue Origin របស់លោក Jeff Bezos បានប្រមូលរ៉ុក្កែតរបស់ខ្លួនមកវិញតាំងពីឆ្នាំ ២០១៥ មកម្ល៉េះ។ ការប្រើប្រាស់ឡើងវិញនូវគ្រឿងបរិក្ខារដែលពីមុននឹងត្រូវបោះចោល ក្រោយពីបញ្ជូនផ្កាយរណប និងទំនិញផ្សេងៗទៅកាន់ទីអវកាសរួច បានជួយឱ្យថ្លៃចំណាយលើការបាញ់បង្ហោះធ្លាក់ចុះ នេះតាមការរាយការណ៍ដដែល។

ទន្ទឹមនឹងនេះ កាសែត The Straits Times របស់សិង្ហបុរីបានរាយការណ៍ថា ជាមួយនឹងជោគជ័យរបស់រ៉ុក្កែត Zhuque-3 ចិនកំពុងបង្រួមគម្លាតដែលបានធ្វើឱ្យក្រុមហ៊ុន SpaceX មានភាពផ្តាច់មុខស្ទើរតែទាំងស្រុងក្នុងការបាញ់បង្ហោះរ៉ុក្កែតធុនធ្ងន់។ កាសែតនេះបានដាក់ច