ការដ្ឋានសាងសង់ផ្លូវរត់យន្តហោះរបស់ចិននៅលើថ្មប៉ប្រះទឹក Antelope ក្នុងប្រជុំកោះ Paracels កំពុងដំណើរការយ៉ាងសកម្ម ខណៈដែលអ្នកវិភាគប៉ាន់ស្មានថា ការដ្ឋាននេះអាចនឹងបញ្ចប់នៅពាក់កណ្តាលឆ្នាំ២០២៧ ដែលនឹងពង្រឹងការគ្រប់គ្រងផ្នែកយោធារបស់ទីក្រុងប៉េកាំងលើតំបន់សមុទ្រចិនខាងត្បូងដែលមានវិវាទ។ នេះបើយោងតាមការរាយការណ៍របស់ DAP News ដែលដកស្រង់ពីការចេញផ្សាយរបស់ទីភ្នាក់ងារព័ត៌មាន Reuters កាលពីថ្ងៃទី២ ខែតុលា ឆ្នាំ២០២៦។

រូបភាពផ្កាយរណបដែលទីភ្នាក់ងារព័ត៌មាន Reuters ទទួលបាន បង្ហាញពីសកម្មភាពឈូសឆាយ គំនរក្រួស បេតុង និងប្រតិបត្តិការគ្រឿងចក្របង្ហាប់ដី ដើម្បីសាងសង់ផ្លូវរត់យន្តហោះខ្នាតធំមួយ។ តាម DAP News រូបភាពទាំងនោះថតដោយក្រុមហ៊ុនផ្តល់សេវារូបភាពផ្កាយរណប Vantor កាលពីថ្ងៃទី២៥ ខែកញ្ញា ដែលបង្ហាញផងដែរពីទូកដឹកក្រួសពេញឆ្ពោះទៅកាន់កំពង់ផែដែលទើបសាងសង់ថ្មី។

Taipei Times ក៏បានរាយការណ៍ថា ការសាងសង់របស់ចិននៅថ្មប៉ប្រះទឹក Antelope កំពុងមានល្បឿនកាន់តែលឿនឡើង ខណៈ The Japan Times រាយការណ៍ថា រូបភាពផ្កាយរណបដែលអ្នកយកព័ត៌មានបានពិនិត្យ បង្ហាញពីការងារកែដី គំនរក្រួស និងបេតុង ព្រមទាំងគ្រឿងចក្របង្ហាប់ដីដែលកំពុងដំណើរការ ដើម្បីសាងសង់ផ្លូវរត់យន្តហោះខ្នាតពេញលេញ។ ចំណែក The Straits Times បានរាយការណ៍ថា ចិនមិនទាន់បានទទួលស្គាល់ការសាងសង់មូលដ្ឋានយោធាថ្មីនេះនៅឡើយទេ។

DAP News បានរាយការណ៍ទៀតថា អនុព័ន្ធយោធា និងអ្នកវិភាគសន្តិសុខបានលើកឡើងថា ទីតាំងនេះអាចក្លាយជាមូលដ្ឋានទ័ពក្រៅឆ្នេរដ៏សំខាន់បំផុតមួយរបស់ចិននៅក្នុងតំបន់។ ការបញ្ចប់មូលដ្ឋានទ័ពនៅ Antelope នឹងក្លាយជាការពង្រីកយោធាដ៏សំខាន់បំផុតរបស់ចិននៅសមុទ្រចិនខាងត្បូងក្នុងរយៈពេលមួយទសវត្សរ៍ចុងក្រោយ។ វានឹងពង្រីកវិសាលភាពនៃនាវាចម្បាំង និងយន្តហោះយោធាចិននៅក្នុងតំបន់ផ្លូវទឹក ដែលកំពុងក្លាយជាទីលានប្រកួតប្រជែងយោធាដ៏ក្តៅគគុក រវាងទីក្រុងប៉េកាំង សហរដ្ឋអាមេរិក និងសម្ព័ន្ធមិត្ត ជុំវិញបញ្ហាតៃវ៉ាន់។

លោក Ben Lewis ស្ថាបនិកទិន្នន័យបើកទូលាយ PLATracker បានលើកឡើងដោយប្រៀបធៀបទៅនឹងការសាងសង់ផ្លូវរត់ប្រវែង ៣ គីឡូម៉ែត្រនៅថ្មប៉ប្រះទឹក Fiery Cross ក្នុងប្រជុំកោះ Spratly កាលពីឆ្នាំ២០១៥ ដោយលោករំពឹងថា ផ្លូវរត់នេះនឹងត្រូវចាក់កៅស៊ូបញ្ចប់នៅឆមាសទី១។ នេះបើយោងតាម DAP News។