កាសែត The Guardian បានរាយការណ៍ថា គណៈកម្មការអឺរ៉ុប បានបញ្ជាក់ថា សហភាពអឺរ៉ុប នឹងកំណត់ការនាំចូលរថយន្តហីប្រ៊ីដ (hybrid) ពីចិន មិនលើសពី ៣៥០,០០០ គ្រឿងក្នុងមួយឆ្នាំ។ តាមការរាយការណ៍ដដែល ការនាំចូលបានកើនឡើងយ៉ាងខ្លាំងក្នុងរយៈពេលពីរឆ្នាំចុងក្រោយនេះ ដោយរថយន្តអគ្គិសនីថ្ម និងរថយន្តហីប្រ៊ីដសាកថ្ម (plug-in hybrid) ប្រហែល ៨០០,០០០ គ្រឿង ត្រូវបានគេរំពឹងថានឹងលក់បាននៅអឺរ៉ុបក្នុងឆ្នាំនេះ។ ការកំណត់ថ្មីនេះ នឹងកាត់បន្ថយចំណែកទីផ្សាររបស់រថយន្តចិននៅអឺរ៉ុបពាក់កណ្តាល មកត្រឹមតែ ៣ ភាគរយ។

កាសែត South China Morning Post រាយការណ៍ថា កិច្ចព្រមព្រៀងនេះ ត្រូវបានប្រកាសកាលពីថ្ងៃសុក្រ បន្ទាប់ពីការចរចាដ៏តានតឹងជាច្រើនសប្តាហ៍ ដោយកំណត់កូតាតឹងរឹងលើការនាំចេញរថយន្តហីប្រ៊ីដរបស់ចិន និងកាត់បន្ថយពន្ធរបស់ចិនលើទំនិញអឺរ៉ុបជាច្រើនមុខ។ តាម SCMP ប៉េកាំង បានយល់ព្រមមិនសងសឹកនឹងវិធានការរបស់ទីក្រុងប្រ៊ុចសែល ហើយថែមទាំងបានកាត់បន្ថយអត្រាបង្វិលសងពន្ធលើតម្លៃបន្ថែម (VAT) លើការនាំចេញផងដែរ។

SCMP រាយការណ៍បន្ថែមថា លោក ម៉ារ៉ូស សេហ្វចូវិច ប្រធានផ្នែកពាណិជ្ជកម្មរបស់សហភាពអឺរ៉ុប បានប្រាប់សន្និសីទកាសែតនៅទីក្រុងប៉េកាំងកាលពីថ្ងៃសុក្រ ថា ចិន បានយល់ព្រមកាត់បន្ថយការនាំចេញរថយន្តហីប្រ៊ីដរាប់លានគ្រឿងទៅកាន់សហភាពអឺរ៉ុបក្នុងរយៈពេល ៤ ឆ្នាំខាងមុខ។ លោក បានឱ្យដឹងថា គ្រាន់តែឆ្នាំក្រោយតែមួយ ការដឹកជញ្ជូននឹងត្រូវកាត់បន្ថយរហូតដល់ ៧០០,០០០ គ្រឿង ដែលមានតម្លៃរហូតដល់ ១៤ ពាន់លានអឺរ៉ូ។ កិច្ចព្រមព្រៀងនេះ បានបន្ធូរបន្ថយភាពតានតឹងពាណិជ្ជកម្មជាបណ្តោះអាសន្ន មុនកិច្ចប្រជុំសំខាន់របស់ថ្នាក់ដឹកនាំអឺរ៉ុប នៅចុងសប្តាហ៍នេះ។

ទីភ្នាក់ងារ France 24 រាយការណ៍ថា សហភាពអឺរ៉ុប ទើបនឹងប្រកាសថា ខ្លួនទទួលបានការប្តេជ្ញាពីចិន ក្នុងការគ្រប់គ្រងលំហូររថយន្តហីប្រ៊ីដចូលទីផ្សារអឺរ៉ុប ដែលអាចកាត់បន្ថយការនាំចេញរបស់ចិនជាងពាក់កណ្តាល។ ព្រឹត្តិការណ៍នេះ កើតឡើងស្របពេលពិព័រណ៍រថយន្តប៉ារីស បើកទ្វារនៅថ្ងៃនេះ។

ទីភ្នាក់ងារ Bloomberg រាយការណ៍ថា ក្រុមហ៊ុនរថយន្តចិន ដឹកនាំដោយ BYD និង Chery ត្រូវបានគេរំពឹងថា នឹងពន្លឿនការបង្កើតរោងចក្រនៅអឺរ៉ុប ដើម្បីគេចផុតពីការកំណត់កូតាហីប្រ៊ីដ និងនឹងបង្ហាញម៉ូដែលហីប្រ៊ីដសាកថ្មថ្មីៗជាច្រើននៅពិព័រណ៍រថយន្តប៉ារីស។ កាសែត The Japan Times រាយការណ៍ថា ចាប់តាំងពីសហភាពអឺរ៉ុប ដាក់ពន្ធបន្ថែមលើរថយន្តអគ្គិសនីចិនក្នុងឆ្នាំ ២០២៤ មក ក្រុមហ៊ុនចិន បានងាកមកពឹងផ្អែកលើរថយន្តហីប្រ៊ីដសាកថ្មកាន់តែច្រើន ដែលបង្កើតបានទីផ្សារតម្លៃ ៧,៥ ពាន់លានដុល្លារនៅអឺរ៉ុប។