សារព័ត៌មាន NDTV របស់ឥណ្ឌា និងកាសែត The Straits Times នៃសិង្ហបុរី បានរាយការណ៍ថា នៅថ្ងៃសៅរ៍ ទី១៣ មិថុនា ក្រុមអ្នកតវ៉ាបានធ្វើបាតុកម្មនៅខាងក្រៅអគារការិយាល័យក្រសួងការបរទេសអ៊ីរ៉ង់ ស្ថិតក្នុងទីក្រុងម៉ាសហាត ភាគឦសានប្រទេស។ ពួកគេបានប្រឆាំងយ៉ាងខ្លាំងចំពោះកិច្ចព្រមព្រៀងសន្តិភាពដែលកំពុងស្ថិតក្រោមការចរចាជាមួយរដ្ឋាភិបាលសហរដ្ឋអាមេរិក ហើយបានរិះគន់ដោយផ្ទាល់ទៅលើរដ្ឋមន្ត្រីការបរទេសអ៊ីរ៉ង់ លោក អាបាស អារ៉ាហ្គឈី (Abbas Araghchi)។

NDTV បានរាយការណ៍បន្ថែមថា ការតវ៉ានេះបានផ្ទុះឡើងបន្ទាប់ពីលោក អារ៉ាហ្គឈី បានចូលរួមបទសម្ភាសន៍តាមកញ្ចក់ទូរទស្សន៍មួយ និងបានពិភាក្សាអំពីលទ្ធភាពនៃការចុះហត្ថលេខាលើកិច្ចព្រមព្រៀងជាប្រវត្តិសាស្ត្រជាមួយទីក្រុងវ៉ាស៊ីនតោន។ អ្នកចូលរួមតវ៉ាបានស្រែកពាក្យស្លោកប្រឆាំងនឹងលោករដ្ឋមន្ត្រី ដោយសម្តែងការមិនពេញចិត្តចំពោះជំហរគាំទ្រការចរចារបស់លោក។

គេហទំព័រ Times of Israel បានរាយការណ៍ពីសមាសភាពនៃក្រុមអ្នកតវ៉ានេះ ដោយបញ្ជាក់ថាពួកគេភាគច្រើនជាសមាជិកក្រុមប្រកាន់តឹងតែង និងជាអ្នកគាំទ្ររដ្ឋាភិបាល។ សារព័ត៌មាននេះបានរាយការណ៍បន្ថែមថា ក្រុមអ្នកតវ៉ាបានអំពាវនាវយ៉ាងម៉ឺងម៉ាត់ថា គ្មានកិច្ចព្រមព្រៀងណាមួយត្រូវបានចុះហត្ថលេខាឡើយ លុះត្រាតែមានការយល់ព្រមជាមុនពីមេដឹកនាំកំពូល លោក មូចតាបា ខាមេណី (Mojtaba Khamenei)។

The Straits Times ក៏បានរាយការណ៍ដែរថា ព្រឹត្តិការណ៍តវ៉ានេះកើតឡើងស្របពេលដែលកិច្ចព្រមព្រៀងសន្តិភាពកំពុងប្រឈមមុខនឹងការប្រឆាំងដែលកំពុងកើនឡើងពីសំណាក់ឥស្សរជនតំណាងក្រុមប្រកាន់តឹងតែងក្នុងឆាកនយោបាយអ៊ីរ៉ង់។