តាមការរាយការណ៍របស់កាសែត South China Morning Post (SCMP) នៅថ្ងៃអង្គារនេះ តៃវ៉ាន់បានចាប់ផ្តើមដំណើរការគេហទំព័រសម្ងាត់មួយកាលពីថ្ងៃអាទិត្យ ដើម្បីប្រមូលព័ត៌មានសម្ងាត់ពីប្រជាជនចិនដីគោក។ ការិយាល័យសន្តិសុខជាតិ (NSB) របស់តៃវ៉ាន់បានហៅវេទិកានេះថា «បង្អួចទំនាក់ទំនង» ហើយវាអាចឲ្យជនជាតិចិនរាយការណ៍ដោយសុវត្ថិភាពអំពីបញ្ហានយោបាយ យោធា សេដ្ឋកិច្ច និងសង្គម។

SCMP បានបញ្ជាក់បន្ថែមថា NSB បានលើកឡើងពីការយកគំរូតាមទីភ្នាក់ងារចារកម្មរបស់សហរដ្ឋអាមេរិក ចក្រភពអង់គ្លេស និងអ៊ីស្រាអែលក្នុងការបង្កើតបណ្តាញនេះ។ ទន្ទឹមនេះ ការិយាល័យបានលើកឡើងពីការមិនពេញចិត្តជាសាធារណៈក្នុងចំណោមប្រជាជនចិន ដែលជំរុញឲ្យមានការសហការ។ ទោះយ៉ាងណា គំនិតនេះបានបង្កឲ្យមានការជជែកពិភាក្សាយ៉ាងទូលំទូលាយអំពីលទ្ធភាពជោគជ័យ និងសុវត្ថិភាពរបស់វា តាម SCMP។

ដោយឡែក កាសែត The Hindu បានរាយការណ៍ថា ការដាក់ឲ្យប្រើប្រាស់គេហទំព័រនេះរួមមានវីដេអូខ្លីមួយដែលប្រើបច្ចេកវិទ្យាបញ្ញាសិប្បនិមិត្ត (AI) ប្រវែង ១ នាទី។ វីដេអូនោះបង្ហាញពីមន្ត្រីរាជការស៊ីវិលចិនម្នាក់កំពុងសង្កេតឃើញមិត្តរួមការងារត្រូវបានដកចេញពីតំណែង និងស៊ើបអង្កេត ដែលឆ្លុះបញ្ចាំងពី «បរិយាកាសដែលមនុស្សគ្រប់គ្នាកំពុងភ័យខ្លាចក្រោមរបបផ្តាច់ការនៅចិន» នេះបើតាមសេចក្តីថ្លែងការណ៍របស់ NSB ដែលត្រូវបានដកស្រង់ដោយ The Hindu។

រីឯ Hong Kong Free Press វិញបានសរសេរថា គេហទំព័រនេះមានគោលដៅអញ្ជើញជនជាតិចិន «ដែលចែករំលែកគុណតម្លៃប្រជាធិបតេយ្យដូចគ្នា» ឲ្យមករាយការណ៍អំពីរដ្ឋាភិបាលក្រុងប៉េកាំង។ ជាមួយគ្នានេះ សារព័ត៌មានហុងកុងឯករាជ្យនេះបានរំលឹកពីភាពតានតឹងរវាងចិននិងតៃវ៉ាន់ ដោយចិនអះអាងថាតៃវ៉ាន់ជាផ្នែកនៃទឹកដីខ្លួន និងបានគំរាមប្រើកម្លាំងយោធា ខណៈដែលរដ្ឋាភិបាលតៃវ៉ាន់ចោទប្រកាន់ទីក្រុងប៉េកាំងពីការប្រើប្រាស់ចារកម្ម និងការជ្រៀតចូលដើម្បីធ្វើឲ្យកោះនេះចុះខ្សោយ។