កាលពីថ្ងៃសុក្រ ទី ១៩ មិថុនា ២០២៦ កាសែត The Straits Times ប្រចាំប្រទេសសិង្ហបុរី និងគេហទំព័រ AsiaOne បានរាយការណ៍ថា លោក លី ជេម្យុង (Lee Jae Myung) ប្រធានាធិបតីនៃសាធារណរដ្ឋកូរ៉េ បានធ្វើសេចក្តីថ្លែងការណ៍នៅទីក្រុងសេអ៊ូលថា លោក ដូណាល់ ត្រាំ ប្រធានាធិបតីសហរដ្ឋអាមេរិក បានយល់ព្រមធ្វើការពិចារណាលើសំណើរបស់លោក ដែលស្នើឱ្យប្រើប្រាស់វិធីសាស្ត្រដំណាក់កាលមួយសម្រាប់ការដោះស្រាយបញ្ហាកម្មវិធីនុយក្លេអ៊ែរនិងកម្មវិធីមីស៊ីលរបស់កូរ៉េខាងជើង។ លោក លី បានបញ្ជាក់ថា កិច្ចពិភាក្សានេះធ្វើឡើងក្នុងជំនួបជាមួយលោក ត្រាំ នៅឯកិច្ចប្រជុំកំពូល G7 ។

ខ្លឹមសារសំខាន់នៃសំណើវិធីសាស្ត្រដំណាក់កាលនេះគឺតម្រូវឱ្យមានការបញ្ឈប់ជាបន្ទាន់នូវសកម្មភាពទាំងឡាយណាដែលពាក់ព័ន្ធនឹងការអភិវឌ្ឍអាវុធនុយក្លេអ៊ែរ និងការសាកល្បងបាញ់មីស៊ីលផ្លោងរបស់កូរ៉េខាងជើងក្នុងរយៈពេលខ្លីខាងមុខ ខណៈដែលការដកហូតអាវុធនុយក្លេអ៊ែរទាំងស្រុងនៅលើឧបទ្វីបកូរ៉េត្រូវបានចាត់ទុកជាគោលដៅចម្បងសម្រាប់រយៈពេលវែងអនាគត នេះបើយោងតាមសេចក្តីរាយការណ៍ដដែល។

ដោយឡែក បណ្តាញទូរទស្សន៍ Al Jazeera ដែលមានមូលដ្ឋាននៅកាតា បានរាយការណ៍ថា កាលពីថ្ងៃសុក្រដដែល ក្នុងអំឡុងជំនួបមួយនៅឯកិច្ចប្រជុំកំពូល G7 លោក ត្រាំ បានប្រាប់លោក លី ថា «ដល់ពេលហើយ» ដែលត្រូវតែដោះស្រាយ «បញ្ហា» កម្មវិធីនុយក្លេអ៊ែរកូរ៉េខាងជើងឱ្យបានយកចិត្តទុកដាក់ឡើងវិញ។

សារព័ត៌មាន Asahi Shimbun ដែលជាកាសែតធំមួយនៅប្រទេសជប៉ុន ក៏បានចុះផ្សាយព័ត៌មាននេះដែរ ដោយបញ្ជាក់ថា លោក ត្រាំ បានថ្លែងថា «ដល់ពេលដែលត្រូវយកចិត្តទុកដាក់លើបញ្ហាកូរ៉េខាងជើងហើយ» ក្នុងការសន្ទនាជាមួយប្រធានាធិបតីកូរ៉េខាងត្បូង។

ក្នុងរបាយការណ៍របស់ខ្លួន Al Jazeera បានដាក់ចំណងជើងថា «Trump hints at new approach to North Korea’s nuclear programme» ដោយចាត់ទុកថាការវិវត្តនេះជាសញ្ញានៃការផ្លាស់ប្តូរយុទ្ធសាស្ត្ររបស់សហរដ្ឋអាមេរិកចំពោះទីក្រុងព្យុងយ៉ាង។