តាមការរាយការណ៍របស់ស្ថាប័នព័ត៌មាន Dawn ប្រចាំប្រទេសប៉ាគីស្ថាន និង DW ការផ្ទុះនេះបានកើតឡើងកាលពីរសៀលថ្ងៃព្រហស្បតិ៍ ទី ៣០ ខែកក្កដា ឆ្នាំ ២០២៦ ដែលបណ្តាលមកពីការប្រមូលផ្តុំឧស្ម័នមេតាន នៅក្នុងអណ្តូងរ៉ែធ្យូងថ្មឯកជនមួយក្នុងតំបន់ Sorange ចម្ងាយ ៣០ គីឡូម៉ែត្រភាគឦសាននៃទីក្រុង Quetta រដ្ឋ Balochistan។ កាសែត The Hindu របស់ឥណ្ឌាបានបន្ថែមថា ហេតុការណ៍នេះកើតឡើងអំឡុងពេលផ្លាស់ប្តូរវេន ហើយការផ្ទុះបានបង្កអគ្គិភ័យ និងធ្វើឲ្យអណ្តូងរ៉ែដួលរលំ ព្រមទាំងប៉ះពាល់ដល់អណ្តូងរ៉ែក្បែរនោះមួយទៀត។ Dawn បានដកស្រង់សម្តីលោក Muhammad Atif ប្រធានអធិការកិច្ចរ៉ែរដ្ឋ Balochistan ដែលបានបញ្ជាក់ថា នៅពេលនោះមានកម្មករសរុប ៣៤ នាក់កំពុងធ្វើការក្នុងអណ្តូងរ៉ែទាំងពីរ ដោយក្នុងអណ្តូងទីពីរមាន ១២ នាក់។

ក្រុមជួយសង្គ្រោះបានរកឃើញសាកសពចំនួន ៣២ នាក់រហូតមកដល់ថ្ងៃសុក្រ ទី ៣១ ខែកក្កដា ហើយកំពុងបន្តស្វែងរកកម្មករ ២ នាក់ដែលនៅបាត់ខ្លួន នេះបើតាមការរាយការណ៍ដដែល។ ទន្ទឹមនឹងនេះ កាសែត The New York Times បានរាយការណ៍ថា ចំនួនអ្នកស្លាប់បានកើនឡើងដល់យ៉ាងហោចណាស់ ៣៤ នាក់ ខណៈ Al Jazeera រាយការណ៍ពីគ្រោះថ្នាក់នេះថាមានអ្នកស្លាប់ ៣២ នាក់។ រដ្ឋមន្ត្រីក្រសួងរ៉ែខេត្ត លោក Mir Shoaib Nosherwani បានប្រកាសថា រដ្ឋាភិបាលនឹងផ្តល់សំណង ៥០ ម៉ឺនរូពីប៉ាគីស្ថានដល់គ្រួសារជនរងគ្រោះម្នាក់ៗ និង ៣ សែនរូពីសម្រាប់អ្នករបួស ព្រមទាំងបើកការស៊ើបអង្កេតលើហេតុការណ៍នេះផងដែរ តាមការរាយការណ៍របស់ Dawn។

Al Jazeera ក៏បានលើកឡើងថា គ្រោះថ្នាក់រ៉ែធ្យូងថ្មនៅប៉ាគីស្ថាន ជាពិសេសនៅ Balochistan គឺជារឿងញឹកញាប់ ដោយសារអណ្តូងរ៉ែជាច្រើនខ្វះការប្រុងប្រយ័ត្នសុវត្ថិភាពជាមូលដ្ឋាន។ កាសែត Dawn បានរាយការណ៍ពីសោកនាដកម្មនៅស្រុក Shangla ខេត្ត Khyber Pakhtunkhwa ដែលកំពុងកាន់ទុក្ខចំពោះការបាត់បង់កម្មករវ័យក្មេង ២៨ នាក់ ក្នុងនោះ ២៣ នាក់មកពីភូមិ Mian Kaly តែមួយ។ យោងតាមសមាគមកម្មកររ៉ែ Shangla ជនរងគ្រោះទាំងនោះមានអាយុចន្លោះ ១៧ ទៅ ២៥ ឆ្នាំ ហើយភាគច្រើនជាសាច់ញាតិបងប្អូនជីដូនមួយនឹងគ្នា។ ពួកគេខ្លះជាកូនកំព្រាដែលឪពុកក៏បានស្លាប់ក្នុងគ្រោះថ្នាក់អណ្តូងរ៉ែពីមុនដែរ។ ប្រធានសមាគមលោក Abid Yaar បានចោទប្រកាន់រដ្ឋបាលអណ្តូងរ៉ែថាមានការធ្វេសប្រហែស ដោយគ្មានប្រព័ន្ធខ្យល់ចេញចូលត្រឹមត្រូវ ដែលនាំឲ្យមានការផ្ទុះឧស្ម័នមេតានដ៏សាហាវនេះ។

ក្រុមគ្រួសារជនរងគ្រោះក៏បានរិះគន់រដ្ឋាភិបាលពីការខ្វះការគាំទ្រផ្នែកដឹកជញ្ជូនសាកសព ដោយពួកគេត្រូវជួលរថយន្តដឹកសាកសពត្រឡប់ទៅស្រុកកំណើតដោយចំណាយផ្ទាល់ខ្លួន តាមការរាយការណ៍របស់ Dawn។ គួរកត់សម្គាល់ថា នេះមិនមែនជាគ្រោះថ្នាក់លើកដំបូងនៅក្នុងតំបន់នេះទេ។ កាលពីខែមេសា កម្មករ ៣ នាក់បានស្លាប់ក្នុងហេតុការណ៍ដួលរលំនៅ Bolan និងកាលពីខែមិថុនា មានមនុស្ស ៣ នាក់រងរបួសដោយសារការផ្ទុះដោយចៃដន្យនៅ Khanuzai នេះបើយោងតាម Dawn។