តាមការរាយការណ៍របស់ France 24 លោក Oleksandr Prokudin អភិបាលខេត្តឃែរសុន បានជំរុញឱ្យប្រជាពលរដ្ឋចាកចេញពីទីក្រុងឃែរសុន ដែលស្ថិតនៅភាគខាងត្បូងប្រទេសអ៊ុយក្រែន កាលពីថ្ងៃព្រហស្បតិ៍។ ប្រភពដដែលបានរាយការណ៍ថា ការវាយប្រហាររបស់រុស្ស៊ីបានធ្វើឱ្យខូចខាតរោងចក្រកំដៅមួយកន្លែងក្នុងសង្កាត់ ហើយបានគំរាមកំហែងដល់ការដាច់ចរន្តអគ្គិសនី និងការបាត់បង់កំដៅរយៈពេលយូរ។

កាសែត The Straits Times ក៏បានរាយការណ៍ស្របគ្នាដែរថា អាជ្ញាធរនៅទីក្រុងឃែរសុនរបស់អ៊ុយក្រែន បានប្រាប់ឱ្យប្រជាពលរដ្ឋចាកចេញពីតំបន់នេះ។ របាយការណ៍ទាំងពីរមិនបានបញ្ជាក់ពីចំនួនប្រជាពលរដ្ឋដែលត្រូវចាកចេញនោះទេ។

យោងតាមទីភ្នាក់ងារព័ត៌មាន Interfax-Ukraine លោកស៊ែហ៊ី ហ្វេដូរ៉េនកូ ប្រធានស្ដីទីក្រុមប្រឹក្សាភិបាលនៃក្រុមហ៊ុន Naftogaz Ukrainy បានថ្លែងថា កងកម្លាំងរុស្ស៊ីបានវាយប្រហាររោងចក្រថាមពលកំដៅរួម (CHP) របស់ក្រុមហ៊ុន ដែលផលិតទាំងអគ្គិសនី និងកំដៅ នៅទីក្រុងឃែរសុន ម្តងទៀត កាលពីយប់ថ្ងៃព្រហស្បតិ៍។ ការវាយប្រហារនេះបានបណ្តាលឱ្យខូចខាតយ៉ាងធ្ងន់ធ្ងរ និងបានបំផ្លាញឧបករណ៍ទាំងអស់របស់រោងចក្រ ដូចដែលសម្តីរបស់លោកត្រូវបានដកស្រង់ដោយ Interfax-Ukraine។

តាមការរាយការណ៍របស់ NDTV រុស្ស៊ី និងអ៊ុយក្រែន បាននិងកំពុងបង្កើនការវាយប្រហាររយៈចម្ងាយឆ្ងាយជាច្រើនខែមកហើយ ដោយកំណត់គោលដៅកាន់តែខ្លាំងទៅលើហេដ្ឋារចនាសម្ព័ន្ធស៊ីវិល ដូចជាឃ្លាំងស្តុកទំនិញ កន្លែងប្រេង និងកំពង់ផែជាដើម។ ការវាយប្រហារលើរោងចក្រកំដៅនៅទីក្រុងឃែរសុន គឺជាផ្នែកមួយនៃនិន្នាការនេះ។