កាលពីថ្ងៃទី ២៩ ខែសីហា ឆ្នាំ ២០២៦ សារព័ត៌មានអន្តរជាតិជាច្រើន បានរាយការណ៍ពីសេចក្តីសម្រេចរបស់តុលាការសហព័ន្ធអាមេរិក ជុំវិញការប៉ុនប៉ងនិរទេសនិស្សិតគាំទ្រប៉ាឡេស្ទីន។ តាមការរាយការណ៍របស់ The Hill, The Hindu និង The Times of Israel ចៅក្រមសហព័ន្ធនៅរដ្ឋកាលីហ្វ័រញ៉ា បានសម្រេចថា ការប្រើប្រាស់ច្បាប់អន្តោប្រវេសន៍ របស់រដ្ឋបាលលោក ដូណាល់ ត្រាំ ដើម្បីដកហូតទិដ្ឋាការ និងបន្តដំណើរការនិរទេសនិស្សិតមហាវិទ្យាល័យ ដែលមិនមែនជាពលរដ្ឋ ដោយសារការតស៊ូមតិគាំទ្រប៉ាឡេស្ទីន គឺផ្ទុយនឹងរដ្ឋធម្មនុញ្ញ។

The Hill បានរាយការណ៍ថា សេចក្តីសម្រេចដែលមានប្រវែង ៩០ ទំព័រនេះ ត្រូវបានធ្វើឡើងដោយចៅក្រមតុលាការសហព័ន្ធ Noël Wise ដែលបានរកឃើញថា រដ្ឋបាលលោក ត្រាំ បានប្រើច្បាប់អន្តោប្រវេសន៍ដែលមានស្រាប់ ដើម្បីលុបចោលទិដ្ឋាការនិស្សិតបរទេស និងនិរទេសពួកគេ ដោយរំលោភលើសិទ្ធិសេរីភាពនៃការបញ្ចេញមតិ តាមរដ្ឋធម្មនុញ្ញរបស់ពួកគេ។

NDTV បានរាយការណ៍ថា សេចក្តីសម្រេចកាលពីថ្ងៃសុក្ររបស់ចៅក្រម Noël Wise គឺជាជ័យជម្នះសម្រាប់កាសែតនិស្សិត នៅសកលវិទ្យាល័យ Stanford ដែលបានបញ្ជាក់ថា និស្សិតអន្តរជាតិមួយចំនួន មានការភ័យខ្លាចក្នុងការបញ្ចេញមតិ ដោយសារតែការគំរាមកំហែងពីការនិរទេស។

Al Jazeera បានរាយការណ៍ថា ចៅក្រមរូបនេះ បានរិះគន់រដ្ឋាភិបាលរបស់លោក ដូណាល់ ត្រាំ ចំពោះការប៉ុនប៉ងរំលោភ លើសិទ្ធិសេរីភាពនៃការបញ្ចេញមតិ របស់និស្សិតបរទេស។ រីឯ The Straits Times បានរាយការណ៍ថា ចៅក្រមបានថ្លែងថា នៅសហរដ្ឋអាមេរិក សេរីភាពនៃការបញ្ចេញមតិ គឺជាភស្តុតាងនៃភាពរឹងមាំ នៃលទ្ធិប្រជាធិបតេយ្យរបស់ប្រទេស។