កាសែត The Straits Times និង South China Morning Post (SCMP) បានរាយការណ៍នៅសប្តាហ៍នេះថា ប្រទេសម៉ាឡេស៊ីកំពុងរៀបចំប្រើបច្ចេកទេសបង្កាត់ពពកដើម្បីនាំទឹកភ្លៀងមកកាន់តំបន់ «ថ្នាលស្រូវ» នៅភាគខាងជើង ដែលកំពុងរងគ្រោះរាំងស្ងួតធ្ងន់ធ្ងរ និងបណ្តាលឱ្យការដាំដុះស្រូវត្រូវពន្យារពេល។ តំបន់នេះត្រូវបានគេចាត់ទុកថាជាប្រភពផ្គត់ផ្គង់ស្រូវដ៏សំខាន់របស់ប្រទេស ហើយការរាំងស្ងួតបានបង្កើនការព្រួយបារម្ភអំពីសន្តិសុខស្បៀង។

យោងតាម SCMP ដែលបានចុះផ្សាយនៅថ្ងៃទី ៩ ឧសភា រដ្ឋមន្ត្រីក្រសួងកសិកម្មនិងសន្តិសុខស្បៀងម៉ាឡេស៊ី លោក Mohamad Sabu បានថ្លែងថា ឆ្នាំ ២០២៦ នេះ ប្រទេសបានទទួលរងអាកាសធាតុស្ងួតយូរ បរិមាណទឹកភ្លៀងទាបជាងប្រក្រតី និងកម្រិតទឹកក្នុងទំនប់ធ្លាក់ចុះ។ លោកបានបន្ថែមថា ស្ថានភាពនេះបានធ្វើឱ្យកសិករខកខានដំណាក់កាលដាំដុះចំនួនពីរ ក្នុងចំណោមដំណាក់កាលធម្មតាទាំងបី សម្រាប់បច្ចេកទេសដាំស្រូវបែប «ព្រោះពូជផ្ទាល់សើម»។

រាជរដ្ឋាភិបាលម៉ាឡេស៊ីបានសម្រេចអនុវត្តបច្ចេកទេសបង្កាត់ពពក ដែលជាការបាញ់សារធាតុចូលទៅក្នុងពពកដើម្បីបង្កើនទឹកភ្លៀង ឲ្យបានឆាប់រហ័សតាមដែលអាចធ្វើទៅបាន។ កាសែត The Straits Times ដែលបានរាយការណ៍ដំបូងនៅថ្ងៃទី ៨ ឧសភា ក៏បានសង្កត់ធ្ងន់ថា ការព្រួយបារម្ភពីការផ្គត់ផ្គង់ស្រូវកំពុងកើនឡើង ដោយសារតំបន់ភាគខាងជើងនេះផ្គត់ផ្គង់ស្រូវយ៉ាងច្រើនដល់ប្រទេស។