រ៉ុក្កែត Long March 7A របស់ប្រទេសចិនដែលដឹកផ្កាយរណបទំនាក់ទំនង ChinaSat-4B បានផ្ទុះនៅលើអាកាសប្រហែល ៩០ វិនាទីក្រោយពីការបាញ់បង្ហោះពីមូលដ្ឋានអវកាស Wenchang នៅភាគខាងត្បូងប្រទេសចិន។ តាមការរាយការណ៍របស់ The Guardian រ៉ុក្កែតនេះបានហោះឡើងនៅវេលាម៉ោង ៨:០២ យប់ ម៉ោងក្នុងតំបន់ ដោយមានគោលដៅបញ្ជូនផ្កាយរណបនេះទៅកាន់គន្លងភូមិស្ថិករ ប៉ុន្តែការបាញ់បង្ហោះបានបរាជ័យ។

វីដេអូនៃព្រឹត្តិការណ៍ដែលថតដោយអ្នកនៅជិតកន្លែងកើតហេតុ និងផ្សព្វផ្សាយដោយ BBC និង The Guardian បានបង្ហាញពីពេលរ៉ុក្កែតហោះឡើង បន្ទាប់មកស្រាប់តែឃើញពន្លឺភ្លើងពណ៌ទឹកក្រូចភ្លឺឡើង អមដោយសំឡេងផ្ទុះ និងផ្សែងហុយ។ បំណែកនៃរ៉ុក្កែតបានធ្លាក់រាត់រាយមកដី ប៉ុន្តែរហូតមកដល់ពេលនេះមិនទាន់មានរបាយការណ៍អំពីការខូចខាត ឬអ្នករងរបួសឡើយ។

Xinhua នៃរដ្ឋាភិបាលចិន បានរាយការណ៍ថា រណារបាញ់បង្ហោះនេះបានបរាជ័យដោយសារ «ភាពមិនប្រក្រតីក្នុងការហោះ» ដែលកើតឡើងមិនយូរប៉ុន្មានក្រោយការហោះឡើង។ ទីភ្នាក់ងារនេះបានបន្តថា ការស៊ើបអង្កេតមួយកំពុងដំណើរការដោយអ្នកជំនាញអវកាសចិន ដើម្បីរកឱ្យឃើញពីមូលហេតុច្បាស់លាស់នៃបញ្ហានេះ ហើយពុំទាន់មានការបញ្ជាក់ណាមួយអំពីពេលវេលាច្បាស់លាស់សម្រាប់លទ្ធផលនៃការស៊ើបអង្កេតនៅឡើយទេ។

យោងតាម The Straits Times ការបរាជ័យនេះគឺជាលើកទីមួយសម្រាប់រ៉ុក្កែត Long March 7A ចាប់តាំងពីការបាញ់បង្ហោះលើកដំបូងរបស់ខ្លួនក្នុងឆ្នាំ ២០២០ មក។ មុននេះ រ៉ុក្កែតប្រភេទនេះធ្លាប់បានដំណើរការដោយជោគជ័យជាច្រើនលើក ក្នុងបេសកកម្មបញ្ជូនផ្កាយរណបផ្សេងៗសម្រាប់ការទំនាក់ទំនង ការរុករក និងការស្រាវជ្រាវ។

ការបរាជ័យនេះកើតឡើងនៅក្នុងបរិបទដែលប្រទេសចិនកំពុងបង្កើនការវិនិយោគយ៉ាងសម្បើមទៅលើវិស័យអវកាស។ Hong Kong Free Press បានរាយការណ៍ថា លោកប្រធានាធិបតី Xi Jinping បានហៅកិច្ចខិតខំនេះថាជា «ក្តីស្រមៃអវកាស» របស់ប្រទេសចិន ហើយថវិការាប់ពាន់លានដុល្លារត្រូវបានចាក់បញ្ចូលទៅក្នុងការស្រាវជ្រាវ ការអភិវឌ្ឍរ៉ុក្កែត និងការកសាងស្ថានីយអវកាស។